<p style="text-align: justify;">کابل (پژواک، ۲۴ لېندۍ ۱۴۰۴): د افغانستان د بهرنیو چارو وزارت دویم سیاسي رییس ذاکر جلالي د سیمهییز اتصال او همکارۍ د فرصتونو او ظرفیتونو د استفادې په اړه د ایران د بهرنیو چارو د وزیر د څرګندونو هرکلی کړی.</p>
<p style="text-align: justify;">د ایران د بهرنیو چارو وزیر سیدعباس عراقچي پرون په تهران کې د «افغانستان د تحولاتو ارزونې» غونډه کې ویلي وو چې د افغانستان ژیوکونومیک موقعیت له امله دغه هېواد د مرکزي اسیا، لوېدیځې اسیا او سوېلي اسیا د ارتباطي شبکو په مرکز کې ځای لري، له همدې امله د افغانستان ثبات او پراختیا یوازې یوه انساني نه، بلکې د ټولې سیمې یوه ستراتیژیکه اړتیا ده.</p>
<p style="text-align: justify;">هغه زیاته کړې وه: «د تېرو څو لسیزو تجربې په څرګنده ښيي چې په افغانستان کې امنیت، پراختیا او سوکالي په مستقیم ډول د ټولو ګاونډیو هېوادونو له ګټو سره تړلي دي؛ له همدې امله بېځایه به نه وي چې که د پاکستاني فارسي ژبې شاعر اقبال لاهوري په څېر ووایو چې زموږ د سیمې ګډ راتلونکی د افغانستان له راتلونکي سره تړلی دی.»</p>
<p style="text-align: justify;">عراقچي دغهراز ویلي وو چې د سیمې ترانزیټي او انرژۍ شبکې نه یوازې د افغانستان له ودې او پرمختګ سره مرسته کوي، بلکې سیمهییزې همپالنې ته هم زمینه برابروي. د سړکونو او اوسپنې پټلۍ پیاوړتیا، د سوداګرۍ اسانتیا، سرحدي همکارۍ او د ترانزیټي دهلېزونو پراختیا کولی شي افغانستان د مرکزي، لوېدیځې او سوېلي اسیا د نښلولو یوه حیاتي کړۍ وګرځوي.</p>
<p style="text-align: justify;">د افغانستان د بهرنیو چارو وزارت دویم سیاسي رییس ذاکر جلالي پر خپله اېکسپاڼه لیکلي چې یوازې له امنیتمحوره لیدلورو تېرېدل او د اتصال، همکارۍ او سیمهییز یووالي برخه کې د افغانستان رغنده رول ته پاملرنه یو اړین او د پام وړ ټکی دی.</p>
<p style="text-align: justify;">هغه لیکلي، هيڅ شک نشته چې له ۲۰۲۱ کال څخه مخکې افغانستان د لسګونو بهرنیو هېوادونو د پوځي حضور او د نږدې او لرو لوبغاړو د لاسوهنو له امله نه یوازې د افغانانو لپاره، بلکې د ټولې سیمې لپاره پر یوه جدي او اندېښمنوونکې امنیتي ستونزه بدل شوی و.</p>
<p style="text-align: justify;">د هغه په وینا، له همدې امله نننی افغانستان نور د ناورین د مدیریت موضوع نه بلل کېږي؛ بلکې د خپل ژیوکونومیک موقعیت، نېک نیت او د اوسني حکومت د اقتصادمحوره بهرنۍ تګلارې له مخې کولی شي چې د مرکزي، لوېدیځې او سوېلي اسیا ترمنځ پر یوه اغېزناک ارتباطي پُل بدل شي.</p>
<p style="text-align: justify;">جلالي زیاته کړې چې د دې ډول لیدلوري په چوکاټ کې به د سیمې هېوادونه وکولای شي د افغانستان له ترانزیټي، سوداګریزو او نښلوونکو ظرفیتونو په اغېزناکه توګه ګټه پورته کړي؛ هغه څه چې په پایله کې به ګډې ګټې تضمین شي او سیمهییزه همپالنه به پیاوړې کړي.</p>
<p style="text-align: justify;">هغه لیکلي چې پر دغو فرصتونو او ظرفیتونو د ایران د بهرنیو چارو د وزیر ښاغلي ډاکټر عراقچي ټینګار د ستاینې وړ دی.</p>
<p style="text-align: justify;">د افغانستان د بهرنیو چارو وزارت دویم سیاسي رییس دغهراز زیاتوي چې په تېرو څلورو کلونو کې د ترانزیټ، سیمهییز اتصال، د سوداګرۍ د اسانتیا او د افغانستان او سیمې هېوادونو ترمنځ د اقتصادي همکاریو د پراختیا برخو کې عملي او عیني ګامونه پورته شوي او دا د دې څرګندونه کوي چې تعاملمحوره چلند او د راتلونکي په اړه فکر کولای شي سیمهییز ثبات، سوکالي او ګډې ګټې تضمین کړي.</p>
<p style="text-align: justify;">هغه وایي، دې ټولو ته په کتو له افغانستان سره تعامل باید د فرصتونو، عیني واقعیتونو او شته ظرفیتونو پر اساس تنظیم شي.</p>
<p style="text-align: justify;">د هغه په خبره، افغانستان او سیمه پراخ بالفعل او بالقوه ظرفیتونه لري چې له هغو دقیقه او سمه ګټهاخیستنه متقابلې ګټې خوندي کولای شي او د ټولو لورو لپاره د یوه ګټونکي پایدار وضعیت زمینه برابروي.</p>
