<p style="text-align: justify;">کابل (پژواک، ۱۴ مرغومی ۱۴۰۴): د ریاستالوزراء اقتصادي مرستیال په کندهار کې د یوې دیني مدرسې د بګړۍ تړلو مراسمو کې ویلي چې علما دې له دیني حکمته په استفادې خلک په نرمه ژبه سمې لارې ته راوبولي او هيچا ته دې تیزه او د پېغور ژبه نه کاروي.</p>
<p style="text-align: justify;">د ریاستالوزراء اقتصادي معاونیت خبرپاڼه کې راغلي چې ملا عبدالغني برادر نن په کندهار کې د الجامعة الاسلامیة دارالعلوم لومړۍ دورې فارغانو د دستاربندۍ مراسمو کې ګډون وکړ.</p>
<p style="text-align: justify;">خبرپاڼه کې راغلي، د ریاستالوزراء اقتصادي مرستیال ملا عبدالغني برادر اخند اسلامي مدارس د ټولنې د اصلاح، د دیني علم، جهاد، فکري روزنې او د اسلامي نهضت مهم بنسټونه وبلل او ویې ویل: «د افغانستان د شل کلن اشغال د پای ته رسولو لپاره د عام ولس ترڅنګ علماوو هم بې شمېره قربانۍ ورکړې او د همدوی د قربانیو له امله نن په هېواد کې اسلامي نظام حاکم شوی دی.»</p>
<p style="text-align: justify;">هغه پر علماوو غږ کړی چې له دیني حکمته په استفادې خلک په نرمه ژبه سمې لارې ته راوبولي او هېچا ته دې د پېغور او تیزه ژبه خبرې نه کوي.</p>
<p style="text-align: justify;">د ده په خبره چې اسلامي امارت د هېواد د هر اړخیز پرمختګ لپاره پر سیاسي او اقتصادي مشارکت باور لري، دغه مشارکت د تېرو څلورو کلونو پر مهال پياوړی شوی او د علماوو، علمي شخصیتونو او مسلکي کارکوونکو د مشورو او نظریو پر اساس ولاړ دی.</p>
<p style="text-align: justify;">هغه دغهراز ویلي، افغانستان کې په مقایسوي توګه اوسنی سیاسي قدرت د ټولو په نسبت ثابت او متعادل ساتل شوی، د نظام او حکومت په چوکاټ کې موازي سیاسي جریانونه، مخالف جهتونه او د ملي پرېکړو پر وړاندې تهدیدوونکي اعمال له منځه تللي او له بلې خوا اداري مشارکت، اداري شفافیت، د اقتصادي زېربناوو جوړول، د عامه خدمتونو وړاندې کول او ملي رضایت لوړ او پیاوړي شوي دي.</p>
<p style="text-align: justify;">د ریاستالوزرا اقتصادي مرستیال پر ټولو هېوادونو غږ کړی چې په سیمهییز او نړۍوال فعال مشارکت کې د افغانستان اسلامي امارت له بالقوه ظرفیت او پياوړې ارادې مناسبه ګټه واخلي.</p>
<p style="text-align: justify;">د هغه په خبره: «یو امن افغانستان د ټولو لپاره له اقتصادي او سیاسي پلوه لوی فرصت ګڼل کېږي، هيڅوک باید فرصتونه پر تهدیدونو بدل نه کړي.»</p>
<p style="text-align: justify;">د ریاستالوزراء اقتصادي مرستیال ټولو هېوادوالو ته ډاډ ورکړی چې د اسلامي امارت له لوري به د هېچا حقوق او امانت ضایع نه شي، ټول هېوادوال باید د هېواد په امنیت، ابادۍ او بیارغونه کې د خپل حکومت ترڅنګ ودرېږي.</p>
