ټرمپ: د هرمز تنګي اړوند مسایلو حل نورو هېوادونو ته سپارو

<p style="text-align: justify;">کابل (پژواک، ۱۲ وری ۱۴۰۵): د راپورونو له مخې، د امریکا ولسمشر ویلي چې له ایران سره جګړه به تر راتلونکو دوو یا درېیو اونیو پورې پای ته ورسېږي او د هرمز تنګي اړوند مسایلو د حل مسؤولیت نورو هېوادونو ته سپاري.</p>

<p style="text-align: justify;">د بلومبورګ د راپور له مخې، د امریکا متحده ایالتونو ولسمشر ډونالډ ترمپ په سپینه ماڼۍ کې خبریالانو ته ویلي چې د هرمز تنګي د پرانیستو مسؤولیت به هغو هېوادونو ته وسپاري چې له دغه تنګي استفاده کوي.</p>

<p style="text-align: justify;">نوموړي زیاته کړې: «زه وایم چې تر دوو اونیو پورې، ښايي دوه اونۍ، یا هم درې اونۍ وروسته، موږ به له هغه ځایه ووځو.»</p>

<p style="text-align: justify;">هغه دا ادعا هم کړې چې امریکا په ایران کې خپلو پوځي اهدافو ته رسېدلې ده.</p>

<p style="text-align: justify;">له بلې خوا، د اسوشیټېډ پرېس خبري اژانس راپور ورکړی چې ډونالډ ترمپ به نن ماښام له ایران د جګړې په تړاو خلکو ته وینا وکړي.</p>