محمودراقي (پژواک، ۲۳ وری ۱۴۰۵): د کاپیسا امنیه قومانداني وايي، د دغه ولایت په مرکز کې یو سړی، وروسته له هغه چې خپل زوی یې د ښکاري ټوپک په وسیله وواژه، د امنیتي ځواکونو له خوا ونیول شو.
د کاپیسا د امنیې قوماندانۍ د مطبوعاتو او عامه اړیکو امریت خبرپاڼه کې راغلي چې دا پېښه نن سهار شاوخوا ۷:۰۰ بجې د دغه ولایت د مرکز محمودراقي اړوند په دادوخېلو کلي کې شوې ده.
د خبرپاڼې له مخې، د عبدالمقیم په نوم د سیمې یوه اوسېدونکي خپل زوی مهاجر د ښکاري ټوپک په ډزو وژلی دی.
امنیې قوماندانۍ لیکلي چې د لومړۍ امنیتي حوزې منسوبین سمدستي د پېښې ځای ته رسېدلي او د قضیې عامل یې نیولی دی.
سرچینه زیاتوي چې دغه قضیه د کاپیسا د امنیې قوماندانۍ د جنايي جرمونو د مدیریت له خوا هر اړخیزه څېړل کېږي څو د پېښې ټول ابعاد روښانه شي.
د کاپیسا امنیې قوماندانۍ ټینګار کړی چې امنیتي ځواکونه شپه او ورځ د خلکو د امنیت د ټینګښت لپاره په خدمت کې دي او له هر ډول جنايي جرمونو سره پرېکنده او پر وخت چلند کوي، څو په ولایت کې ثبات او امنیت لا پیاوړی شي.
