کابل (پژواک، ۱۵ چنګاښ ۱۴۰۵): د پکتیا امنیه قومانداني وایي چې د دغه ولایت په ډنډپټان ولسوالۍ کې له پاکستانه راقاچاق شوې یو شمېر وسلې کشف او ترلاسه شوې دي.
د یادې قوماندانۍ خبرپاڼه کې راغلي، دغه وسلې چې ۲۰ تومانچې او څلور ټوپک پکې شامل دي، د ډنډپټان ولسوالۍ په ناري ژوره سیمه کې کشف او ترلاسه شوې دي.
خبرپاڼه زیاتوي، د دغو وسلو په تړاو تر اوسه څوک نه دي نیول شوي، خو د عاملینو پېژندلو او نیولو لپاره یې هڅې روانې دي.
