ټولنه

د غور د پاسپورټ په اداره کې مسوولین د روان کال په تېرو شپږو میاشتو کې په دغه ولایت کې د ۱۷ زره ټوکه پاسپورټونو له وېشل کېدو خبر ورکوي چې له درکه یې څه باندې ۹۲ میلیون افغانۍ عواید ترلاسه شوي دي.

د فراه ولایت په اناردره ولسوالۍ کې د دوو کورنیو ترمنځ نهه کلنه دښمني د قومي مشرانو او حکومتي مسوولینو په منځګړیتوب پای ته ورسېده.

د کار او ټولنیزو چارو وزارت وایي چې د زیانمنو او بې‌سرپرسته ښځو لپاره په حمایوي مرکزونو کې د روغتیايي، رواني، خوړو او سرپناه خدمتونو وړاندې کولو په موخه یې د اماراتي ادارو ترمنځ شپږ اړخیزه هوکړه‌لیک لاسلیک کړی دی.

د ننګرهار د عامې روغتيا رياست له لوري د ناروې کمېټې په مالي ملاتړ د معلولينو د درملنې او د بدن د مصنوعي غړو جوړولو روغتون بېرته فعال شو.

د کار او ټولنیزو چارو وزارت وایي چې د کابل په څرخي پله سیمه کې ۵۶۰ درملنه شوي روږدي د فني او حرفوي زده‌کړو له مرکزه فارغ او خپلو کورنیو ته وسپارل شول.

د کورنيو چارو وزارت لومړی مرستيال وايي، له ځوانانو دې د حکومت په چارو کې په کافي اندازه کار واخیستل شي او له ځوانانو یې غوښتي چې د اوسني نظام ملاتړ وکړي او په پردیو پسې دې نه ځي.

د عدلیې وزارت ویلي چې د بلخ په مرکز مزارشریف ښار کې د خالد بن ولید ښارګوټي اړوند سندونو او مدارکو د څېړنې پایله کې د دغه ښارګوټي ۲۷۶۱ جریب ځمکه امارتي او لس جریب نوره شخصي تثبیت شوه.

د پکتیکا د ارګون ولسوالۍ د «درې» یو شمېر اوسېدونکي شکایت کوي چې د سیمې سړکونه یې خامه دي، روغتیايي، ښوونیزو او مخابراتي خدمتونو او د څښاک پاکو اوبو ته هم بشپړ لاسرسی نه لري.

سیمه‌ییزې سرچینې وایي چې په هلمند او سرپل ولایتونو کې له څه باندې ۹۰۰ کورنیو سره د خوراکي توکو مرسته وشوه.

د اروزګان د یو شمېر ولسوالیو او لرې پرتو سیمو اوسېدونکي شکایت کوي چې لا هم په خپلو سیمو کې مخابراتي خدماتو ته لاسرسی نه لري‎ او د یوې ټیلیفوني اړیکې لپاره اړ دي ساعتونه مزل وکړي.

د لوګر کرنې، اوبو لګولو او مالدارۍ ریاست وایي چې د دغه ولایت په مرکز پل‌علم او بره‌کي‌برک ولسوالۍ کې ۸۰۰ بې‌وزله ښځو ته د چرګانو واړه فارمونه جوړ شول.

د افغاني سرې میاشتې ټولنه وايي، په تېر یوه کال کې یې څه باندې پنځه میلیون وګړو ته روغتیایي خدمتونه وړاندې کړي، له یو میلیون څخه زیاتو زیانمنو سره یې مرسته کړې و همداراز د هېواد په کچه یې ۱۱۶ زره او ۲۵۹ سوالګر راټول کړي دي.