ټولنه

د افغانستان د احصایې او معلوماتو ملي اداره وايي چې خلکو ته د اسانتیاوو برابرولو او په چټکۍ د عامه خدمتونو د وړاندې کولو په موخه ننګرهار کې د اسان خدمت مرکز پرانیستل شو.

د کندهار د روږدو درملنې په ۱۰۰ بستریز روغتون کې چې د اروپايي ټولنې په مالي مرسته فعال دی، پر نشه‌یي توکو څلوېښت روږدو کسانو د درملنې تر څنګ  حرفوي زده‌کړې هم ترلاسه کړې دي.

لوګر کې د ناسمو دودونو مخنیوي په موخه جوړه شوې یوه غونډه کې د دغه ولایت مسوولینو او قومي مشرانو ویلي چې په ټولنه کې د ناسمو دودونو له امله هر کال لسګونه ځوانان په ناقانونه ډول بهرنیو هېوادونو ته ځي او په لارو کې له بېلابېلو خطرونو سره مخ کېږي.

د جلال‌اباد ښاروالي وايي، تېر لمریز کال کې یې ۵۸۰ میلیونه افغانۍ عواید راټول کړي، دغه راز د ښاري پراختيا په موخه یې د دوو نوو ناحيو رامنځته کولو پلان جوړ کړی چې د رياست‌الوزرا له تایید وروسته به پلی شي.

د بلخ ځایي مسوولین وایي، تېر ۱۴۰۳ لمریز کال یې په دغه ولایت کې شاوخوا سل زره ټوکه پاسپورټونه وېشلي او څه باندې ۴۰۰ بهرنیو وګړو ته یې ویزې ورکړې دي.

د یوې قومي جرګې له لارې د جوزجان په مرکز شبرغان ښار کې د دوو کورنیو ترمنځ لس کلنې دښمنۍ ته د پای ټکی کېښودل شو؛ د دواړو کورنیو غړو یو بل ته بښنه وکړه، دښمني او کینه یې له منځه یووړه او سوله یې وکړه.

د نورستان کانتیوا ولسوالۍ یو شمېر اوسېدونکي وايي، په دغه ولسوالۍ کې د سختو بادونو له امله د یوازینۍ مخابراتي شبکې پایه نړېدلې او له نږدې یوې اونۍ راهیسې له مخابراتي خدمتونو محروم دي.

د امر بالمعروف نهی عن المنکر او شکایتونو اورېدو وزارت سرپرست نن په یوه خبري غونډه کې د دغه وزارت محتسبینو ته په لارښوونه کې وویل چې د ټولنې ذهنیت جوړونې لپاره دې کار وکړي او له زور او جبر څخه دې کار نه اخلي.

د لغمان د الیشنګ ولسوالۍ د ۱۲ کلیو اوسېدونکي چې اوس له لرګیو څخه پر یوه جوړ شوي پل له سیند تېرېږي، وايي چې معیاري پل دې ورته جوړ شي؛ ځکه کله چې اوبه ډېرې شي، د لرګیو پل ویجاړوي او بیا اړ دي د مهترلام ښار تر عمومي سړکه دوه ساعته پلی مزل وکړي.

د خوست یو شمېر اوسېدونکي غوښتنه کوي چې د دغه ولایت د تڼیو ولسوالۍ په «ادمامد» تفريحي سيمه کې دې د ځنګلونو وهلو مخنیوی وشي، خو سیمه‌ییز مسوولین وایي چې تر ډېره یې د دې چارې مخه نیولې ده.

د اروزګان په خاص‌اروزګان ولسوالۍ کې د دوو کورنیو ترمنځ شپږ کلنه دښمني د قومي مشرانو، دیني عالمانو او سیمه‌ییزو مسوولینو په هڅو او منځګریتوب پای ته ورسېده.

په نیمروز کې د وچکالۍ په اړه د پژواک د یوه راپور له خپرېدو وروسته چې ځيني کورنۍ کډه کېدو ته اړې شوې وې، یوه خیرخواه کس د دغه ولایت د یوه کلي د اوسېدونکو د څښاک پاکو اوبو د ستونزې هواري په موخه څاه وکنله او خلک یې د اوبو راوړلو په موخه له دوه ساعته مزله خلاص کړل.