اسعد اباد (پژواک ٢٨ مرغومى ٩٠): د کونړ والي وايي چې د ايساف او افغان کومانډو ځواکونو په عملياتو کې پنځه عام وګړي او دوه وسلوال طالبان وژل شوي دي.
د کونړ والي سيد فضل الله وحيدي د مرغومي په ٢٨مه، پژواک خبري اژانس ته وويل چې دا عمليات د ايساف او افغان ځواکونو له خوا دوه ورځې مخکې، د څوکۍ په دېوه ګل سيمه کې پيل شوي وو او پرون پاى ته ورسېدل.
هغه زياته کړه، چې د دې عملياتو په ترڅ کې پنځه ملکي وګړي او دوه وسلوال مخالفين وژل شوي دي.
د والي په وينا، په وژل شويو ملکي وګړيو کې دوه ماشومان او يوه ښځه شامله ده.
د څوکۍ ولسوالۍ د پرمختيايې شورا مشر ممتاز چمبيلى بيا وايي، چې په دغو عملياتو کې نهه کسان وژل شوي، چې دوه يې طالبان او اووه نور يې ملکي خلک دي.
د نوموړي په وينا، په ګډو عملياتو کې څلور تنه وژل شوي ملکي وګړي د يوې کورنۍ غړي دي.
د چمبيلي په وينا، په وژل شويو طالبانو کې يې يو د طالبانو د يوه قوماندان ملا بصير ورور دى، چې تېر کال يې د للينډا نارګرو په نوم يوه بهرنۍ مېرمنه يې تښتولې وه.
بل خوا په ختيځو ولايتونو کې د ايساف ځواکونو مطبوعاتي دفتر دا خبره ردوي، چې ګواکې په دې عملياتو کې عام وګړي وژل شوي دي.
په ختيځ کي د ايساف ځواکونو مطبوعاتي دفتر د مرغومي په ٢٨مه، پژواک خبري اژانس ته وويل چې دغه عمليات د څوکۍ ولسوالۍ د دېوه ګل په سيمه کې ترسره شوي او په ترڅ کې يې اووه وسله وال مخالفين وژل شوي دي.
د وسلوالو طالبانو په وېبپاڼه کې راغلي، چې د څوکۍ د تېرې شپې په عملياتو کې شپږ کورني سرتېري او پنځه طالبان وژل شوي دي.
