لښكرګاه (پژواك ٢٠ كب ۹۱): په هلمند كې د ايساف هوايي بريد د دغه ولايت يو فلمي لوبغاړى نظرمحمد مجنون يار هلمندى او درې د دولت وسله وال مخالفين وژلي دي.
دغه خبره د وژل شوي فلمي لوبغاړي ورور دلاور د كب په ٢٠ پژواك خبري اژانس ته وكړه.
نوموړي زياته کړه، چې مجنون يار پرون غرمه ۱۲ بجې د لښكرګاه اړوند خوشكابې سيمې ته د ناروغې خور پوښتنې ته تللى و.
د دلاور په وينا، مجنون يار په ياده سيمه كې طالبانو د هويت له كارت او اسنادو سره نيولى و.
هغه وايي، چې طالبانو په ياده سيمه كې له نوموړي څخه پلټنې كولې چې پر همدې مهال د ايساف ځواکونو هوايي بريد کړى او له امله يې مجنون يار له درېيو طالبانو سره يو ځاى وژل شوى دى.
د مجنونيار هلمندي ورور وايي، چې له همدې سيمې څخه له هوايې بريده څوشېبې وړاندې يو كس ورته ټيلېفون وکړ، چې طالبانو يو تن د جاسوسۍ په تور نيولى، خو وروسته معلومه شوه، چې هغه جاسوس نه بلکې د ده ورور دى.
ده زياته کړه: ((كه څه هم د ورور جسد يې ټوټه ټوټه شوى و او د پېژندلو نه و، خو د هغه له جامو او څپليو مو وپېژاند، څلور بجې وې، چې کور ته مو ولېږداوه.))
د هلمند د امنيه قوماندانۍ مطبوعاتي دفتر دغه هوايي بريد تاييدوي خو وايي، چې په دغه بريد کې د محمد عالم په نوم يو سيمه ييز طالب قوماندان وژل شوى دى.
د قوماندانۍ د چارواكو په خبره، كېداى شي همدغه فلمي لوبغاړى هم په همدې پېښه كې وژل شوى وي.
د يادولو ده، نظرمحمد مجنون يار هلمندي په تېرو څو كلونو كې ۱۳ بېلابېل فلمونه، چې د نشه يي توكو، فساد، ترهګرۍ او نورو دې ته ورته برخو پر ضد يې پيغامونه لېږدول، جوړ کړي دي.
