لښکرګاه (پژواک ٣ ورى ٩٢): د هلمند د سنګين ولسوالۍ اوسېدونکي او مسوولين وايي، چې د وسله والو طالبانو له خوا پر يوه ملکي موټر بريد کې يوه ښځه او د هغې ماشومه لور وژل شوې ده.
د سنګين د څاروان کلا د سيمه ييزو پوليسو قوماندان نعمت الله د وري په ٣مه پژواک اژانس ته وويل، چې پېښه نن سهار نهه نيمې بجې په داسې حال کې رامنځته شوه، کله چې د سيمې اوسېدونکي په يوه کرولا موټر کې لښکرګاه ته روان وو.
هغه زياته کړه، چې وسله والو طالبانو پر ياد موټر د ګرشک ولسوالۍ په کمپرک مانده سيمه کې بريد کړى، چې له امله يې يوه ښځه او يوه ماشومه وژل شوې ده.
د نوموړي په وينا، بريد کوونکي درې تنه وو، موټر ته يې د درېدو اشاره کړې وه، خو چې نه و درېدلى، ډزې يې پرې کړې دي.
نعمت الله وايي، چې په دغه موټر کې نورو سپرليو ځانونه د پوليسو پوستې ته رسولي دي.
هغه زياتوي، چې ياده کورنۍ په لښکرګاه کې د خپلوانو کور ته روانه وه.
په ياده پېښه کې د وژل شوو کسانو مړي د سيمو اوسېدونکو لښکرګاه ته د احتجاج په توګه راوړي وو.
د سنګين د ټولنيزې شورا غړي عليشاه خان پژواک اژانس ته وويل، د عامه نظم پوليس يواځې خپل ځانونه ساتي، د سړک او خلکو ساتنه نه کوي.
نوموړي زياته کړه، چې ياده پېښه د پوليسو پوستې ته په څو مترۍ کې رامنځته شوې، خو پوليسو هېڅ اقدام نه دى کړى.
د هغه په وينا، پوليسو او طالبانو په خپلو کې پر يو بل د بريد نه کولو پرېکړه کړې او زيان يواځې عامو وګړو ته رسوي.
د هلمند ولايت مقام وايي، چې د دې پېښې د څېړنې لپاره يې يو پلاوى ټاکلى دى.
وسله والو طالبانو تر اوسه په دې اړه څه نه دي ويلي.
