هرات( پژواک،٢ لړم ٩٢): چارواکي وايي،چې په هرات کې د ملي اردو د سرتېرو پر موټر د ماين چاودنې له امله شپږ سرتېري ووژل شول.
د هرات د ادرسکن ولسوال لعل محمد عمرزي د لړم په ٢مه پژواک ته ويل، چې دغه چاودنه ماسپښين د هرات _ کندهار پر لاره د ګردان په سيمه کې رامنځ ته شوه.
د نوموړي په وينا، د ملي اردو د سرتېرو موټر له شينډنډ ولسوالۍ څخه د هرات ښار پر لوري روان و، چې د سړک غاړې ماين پرې وچاودېد.
طالب وياند قاري يوسف احمدي د پېښې مسووليت پر غاړه اخيستى او په چاودنه کې وژل شوي کسان يې بهرنيان بللي ، نوموړي ويلي ، چې د دوى د سپرلۍ ټانک په بشپړه توګه ويجا شوى.
ادرکسن ولسوالي د هرات ښار سوېل ختيځ ۴۵ کيلومترۍ کې پرته ده، چې کله کله په کې د نا امنۍ پېښې رامنځ ته کيږي.
د يو بل خبر له مخې، تېره شپه په بادغيس کې د سرحدي پوليسو تر منځ په خپلمنځي نښته کې دوه تنه وژل شوي دي.
د بادغيس يوه امنيتي چارواکي، چې نه يې غوښتل نوم يې څرګند شي پژواک ته وويل،چې پېښه د بالامرغاب ولسوالۍ په جوى ګنج پوسته کې رامنځ ته شوې ده.
سرچينه وايي، چې د پېښې په اړه يې پلټنه پيل کړي، خو تر دې مهاله يې لامل څرګند نه دى.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن