کلات (پژواک، ٩ کب ٩٣): د زابل د ولايتي شورا رييس نن سهار له يوې چاودنې روغ وتلى، خو دوه ساتونکي يې ژوبل شوي دي.
د ولايتي شورا رييس حاجي عطا جان د کب په ٩مه پژواک خبري اژانس ته وويل دا چاودنه نن سهار شاوخوا اووه بجې په شاه جوى ولسوالۍ کې د ده پر موټر وشوه.
هغه زياته کړه، چې دى له چاودنې روغ وتلى، خو دوه ساتونکي يې ژوبل شوي دي، چې د درملنې لپاره روغتون ته لېږدول شوي دي.
د شاه جوی ولسوالۍ امنيه قوماندان محمدالله احمدي پژواک اژانس ته وويل چې د ولايتي شورا رييس تېره شپه په يو نږدې کلي کې مېلمه و.
د هغه په وينا، کله چې نوموړى نن سهار د ولسوالۍ د مرکز پر لور روان و، نو په يوه لاسي کراچۍ کې ځاى پر ځاى شوي چاودېدونکو پرې وچاودېدل.
امنيه قوماندان وايي چې د ولايتي شورا رييس له چاودنې روغ وتلى، خو دوه ساتونکي يې ټپيان شوي دي.
د دې چاودنې مسووليت تر اوسه چا پر غاړه نه دى اخيستى.
