کندوز (پژواک، ١٤ ليندۍ ٩٤): د کندوز ولايت د شېرخان بندر د پول يوې برخې د وروستۍ زلزلې له امله زيان ليدلى، د ګمرک مشر او سوداګر له دولت نه غواړي چې د ترميم په برخه کې يې اقدام وکړي.
شېرخان بندر د هېواد له مهمو بندرونو څخه دى چې له تاجکستان سره د نښلېدو دغه پول د امو سيند له پاسه جوړ شوى چې ٦٧٠ متره اوږدوالى او ١١ متره پلنوالى لري.
ياد پول د امريکا په ٣٠ ميليونه ډالره مرستې جوړ شوى او د ١٣٨٦ لمريز کال په لړم مياشت کې په رسمي ډول پرانیستل شو.
د شېرخان بندر د ګمرک مشر شهاب الدين بارو وويل چې دغه پول د سوداګريزو توکو په لېږد را لېږد کې اړينې اسانتياوې رامنځته کړې، خو يوې پايې يې د وروستۍ زلزلې له امله درز کړى دی.
د روان کال د لړم په څلورمه نېټه د ریښتر په ٧.٧ درجې زلزلې کابل او د هېواد شمال او شمال ختيځې سيمې ولړزولې چې له امله يې ١١٥ کسان مړه شول، څه باندې ٥٠٠ کسه نور ژوبل شوي او د استوګنې اووه زره کورونه ويجاړ شول.
د شېرخان بندر د ګمرک مشر د شېرخان بندر د مامورينو د ستونزو او ننګونو د اورېدو غونډې ته په خبرو کې خبردارى ورکړ چې که د دغه پله په اساسي ترميم کې ژر تر ژره اقدام ونه شي، د افغانستان او منځنۍ اسيا د هېوادونو تر منځ به اړيکې پرې شي.
ملي او نړيوال سوداګر خپل سوداګريز مالونه د دغه بندر له لارې د منځنۍ اسيا، منځني ختيځ، مرکزي، اسيا او فارس خليج څخه افغانستان ته واردوي.
د شېرخان بندر ګمرک مشر وويل چې اوسمهال پر دغه پله تګ راتګ کوي، خو که ترميم نه شي، نو امکان لري چې د صادراتو او وارداتو پروسه پرې بنده شي.
هغه د ترانسپورټ او هوايي چلند له وزير محمدالله بتاش او د ولسمشر له استازي غوښتنه وکړه چې د دغه پول د ترميم په برخه کې اقدام وکړي.
د ترانسپورټ او هوايي چلند وزير وويل چې ددغه پول له زيان يې له نږدې ليدنه کړې او د فوايد عامې وزارت ته وړانديز کوي چې د پول دا برخه ډېر ژر ترميم کړي.
بتاش چې د يوه پلاوي په مشرۍ د بېلابېلو برخو د ستونزو د حل په موخه شېرخان بندر ته تللى، د ښاروالۍ لپاره د ځمکې او د افغانستان بانک د څانګې نشتوالى، د ښاري ماسټر پلان پلي کېدل، د ښار ګوټي جوړول او په دې بندر کې د سوداګريزو کارونو لپاره د امنيت ښۀ کېدل، له ستونزو وبلل او زياته يې کړه چې دا ستونزې او مشکلات به په کابل کې له اړوندو چارواکو سره شريک کړي چې د حل په برخه کې يې اقدام وشي.
د عبدالرازق په نوم يوه سوداګر وويل چې دغه پول د سوداګريزو کارونو لپاره مهم او بنسټيز رول لري او بايد د ترميم په برخه کې يې ژر اقدام وشي که نه سوداګر به سخت زيان وکړي.
هغه پژواک خبري اژانس ته وويل: ((پخوا چې پول نه و موږ به خپل مالونه د کښتيو په وسيله له ګڼو ستونزو زغملو او لګښتونو وروسته لېږدول چې کله به کښتۍ چپه شي او ټول مالونه به مو اوبه ډوب کړي، خو اته کاله کېږي چې دا ستونزه حل شوې ده.))
غړي
You need to subscribe to view the full article. Please login or register a new account.
