هرات ښار(پژواک، ٤ ورى ٩٥): د هرات په نور روغتون کې هره ورځ تر پنځو پورې د داسې ناروغانو درملنه کېږي چې سترګې يې د بخار ديګ په چاودنه کې زيانمنې شوې وي.
د دغه روغتون چارواکي وايي چې د تېر يوه کال په ترڅ کې څه باندې ٤٥٠ داسې کسانو دغه روغتون ته مراجعه کړې چې سترګو يې د بخار ديګ په چاودنو کې زيان ليدلى و.
د ياد روغتون مشر ډاکتر جمال اخندزاده پژواک خبري اژانس ته وويل چې د تېر کال په اوږدو کې درې مېرمنو د سخت زيان لېدو له امله د سترګو ليد له لاسه ورکړى دی.
اخندزاده زياته کړه، په ټوليز ډول د هغو کسانو شمېر چې د سوځېدنې په ځانګړي ډول د بخار ديګ په چاودنه کې زيانمن شوي، يواځې يو سلنه يې نارينه او نورې ښځې دي.
د هرات د نور روغتون مشر وويل چې د بخار ديګونو د چاودلو يو لامل د دغو ديګونو نا معياري والى دى چې بايد اړوند چارواکي د دې ډول بخار ديګونو چې په افغانستان کې جوړېږي، د پلور مخنيوى وکړي.
نوموړي کورنيو ته په سپارښتنه کې وويل چې په خپلو کورونو کې له معياري بخار ديګونه وکاروي او د دې تر څنګ دې په ديګونو کې د خوراکي توکو اندازه کمه کړي.
مرضيه يوه بله ٢٠ کلنه نجلۍ ده چې د بخار ديګ په چاودنه کې په يوه سترګه ړنده شوې او بلې سترګې يې زيان ليدلى دى.
نوموړې چې د خپلې سترګې د عملياتولو لپاره يې نور روغتون ته مراجعه کړې، وويل: ((شوروا مې پخوله، کله مې چې د ګاز له سره ديګ راپورته کړ چاودنه وشوه، نور نو په ځان نه يم پوهېدلى.))
د خديجې په نوم يوه ښځه چې په دې پېښه کې يې سترګې زيان ليدلى، وويل: ((د بخار ديګ چاودنه وشوه، سترګې مې زيانمنې شوې او اوس له عينکو کار اخلم.))
په ورته وخت کې د هرات حوزوي روغتون وياند محمد رفيق شېرزي پژواک ته وويل چې په تېر کال دريو مېرمنو د بخار ديګ د چاودنې په سبب خپل ژوند له لاسه ورکړې.
دا په داسې حال کې ده چې د هرات ولايت وياند جيلاني فرهاد پژواک ته وويل چې د هرات ځايي اداره به له بېلابېلو اصنافو سره په همغږۍ د غير معياري ديګونو د پلور د مخنيوي په برخه کې عملي ګامونه واخلي.
هغه وويل: ((د هرات ځايي اداره نه يواځې چې د بې کيفيته بخار ديګونو د مخنيوي لپاره پروګرام لري، بلکې هڅه کوي چې په هرات ولايت کې د ټولو بې کيفيته مالونو مخنيوى هم وکړي.))
بلخوا په هرات کې ګڼ شمېر ټولنيز کارپوهان هم بې سټندرده بخار ديګونه هغه ماينونه بولي چې په هره افغانه کورنۍ کې شته او هره شېبه يې ژوند ګواښي.
غړي
You need to subscribe to view the full article. Please login or register a new account.
