مزارشريف (پژواک، د ليندۍ لومړۍ نېټه ۹۵): د لومړي ځل لپاره د بلخ په ګډون د شمال په يو شمېر ولايتونو کې د ژمي لومړۍ واوره و ورېده چې د عامو خلکو او کروندو د خوښۍ لامل شوى دى.
له تېرې شپې څخه تر سهاره پورې په بلخ، کندوز، تخار، بدخشان، فارياب، سمنګان، جوزجان ، بغلان او دسالنګ په سيمه کې واوره شوې ده.
د بلخ ولايت د کرنې چارو دولتي چارواکي او سيمه ييز کروندګر وايي چې شوې واورې يې ځمکې د نوو فصلونو د کرکيلې لپاره چمتو کړې او په تمه دي چې کرنيزې اوبه به هم ورسره ډېرې شي.
بلخوا د روغتيايي چارو مسوولين بيا شوې واوره د بلخ ولايت د وچ موسم لپاره د ځينو ناروغيو د مخنيوي په برخه کې ګټوره بولي.
د بلخ ولايت د کرنې او مالدارۍ چارو رييس سراج الدين مهربان پژواک خبري اژانس ته وويل چې په روان موسم کې په بلخ ولايت کې د کرنيزو اوبو د کمښت اندېښنه ډېره وه.
نوموړي زياته کړه چې د ليندۍ په لومړۍ د واورې ورښت دا مانا لري، چې روان کال کې به بارانونه او واورې ډېرې وي او د اوبو د کمښت اندېښنه به ورسره ورو ورو کمه شي.
هغه وايي چې د شوو واورو له امله کرنيزې اوبه ډېرېږي او تر ځمکې لاندې د اوبو سرچينو ته ګټه رسوي.
مهربان وويل چې شوې واوره به له کروندګرو سره د نوو فصلونو په کر کې هم مرسته وکړي.
د چمتال ولسوالۍ اوسېدونکي کروندګر عبدالقيوم پژواک ته وويل، چې ځمکې يې وچې وې او د نوي فصل د کرلو لپاره يې د اړتيا وړ اوبه هم نه لرلې.
نوموړي زياته کړه چې له شوې واورې سره ځمکې رطوبت واخيست چې له امله يې په سمه توګه د کرکيلې لپاره چمتو کړای شوه.
هغه وايي چې همدا وخت د غنمو او اوربشو د کر دی چې له شوې واورې وروسته به کروندګر په ابي او للمي ځمکو کې کر پيل کړي.
د بلخ د روغتيايي چارو مسوولين بيا وايي چې که له يو اړخه شوې واوره د ځينو نارغيو مخنيوی کوي؛ نو د ځينو ناروغيو د خورېدو په برخه کې زيانونه هم لري.
د ملکي روغتون سرطبيب ډاکټر نورمحمد فيض پژواک ته وويل، چې د بلخ وچ او ګردجن موسم لپاره شوې واوره ډېره ګټه لري.
نوموړي زياته کړه چې په ښار او کليو کې به د ژمي بادونو له ځان سره ګرد او خاوره هم لرله چې د ډېرو ناروغيو لامل به کېدل.
هغه وايي، په ژمي کې د کولمو درد، اسهال او دې ورته ناروغۍ کمېږي؛ خو که احتياط ونه شي؛ نو د سينه بغل او زکام ناروغيو د زياتېدو لامل ګرځي.
بلخوا د فارياب ولايت د کرنې يون کارپوه عبدالمنان جوره زاده پژواک اژانس ته وويل چې د دغه ولايت٨٠ سلنه وګړي پر کرنه بوخت دي ې پورې تړاو لري او کروند ګر له ډېرې مودې راهيسې د واورې او باران په تمه وو.
هغه اوسنۍ واوره د کرنې لپاره ډېره ګټوره وبلله.
غړي
You need to subscribe to view the full article. Please login or register a new account.
