کندهار (پژواک، ١٦ سلواغه ٩٥): په کندهار کې ۲۴ کلونه وروسته واوره اورېدلې چې د يوه سمسور او اباد کال لپاره يې د خلکو هېلې ډېرې کړي دي.
د واورې د اورېدو په خوښۍ کې د کندهار ښار ډېری وګړي له خپلو ماشومانو سره يو ځای دښتو او نږدې ولسواليو ته ته ووتل او د ابادۍ او سولې لپاره يې په نېک فال ونيوله.
د کندهار د کرنې رياست د معلوماتو له مخې په دې ولايت کې له سهار وختي څخه په پر له پسې توګه څو ساعته واوره اورېدلې چې کچه يې تر ۴ سانتيي متره ډېره ده.
د کندهار ښار اوسېدونکی تاج محمد له خپلو ماشومانو سره يو ځای دامان ولسوالۍ ته راغلی و او د واورې له اورېدو يې خوند اخيست.
هغه پژواک اژانس ته وويل، سهار وخته چې له خوبه را پاڅېد نو ويې ليدل چې واوره اورېدلې؛ نو پرېکړه يې وکړه، چې له خپلو ماشومانو سره يو ځای به د واورې د اورېدو خوښي نمانځي.
د ده په خبره، کندهار کې که څه هم څو کاله مخکې ډېره کمه واوره شوې وه، خو دغسې ډېره واوره ۲۴ کلونه وروسته اوري.
تاج محمد وايي، د واورې اورېدو ټول خلک خوشاله کړي او په دې هيله ده چې سږ کال به اباد او سمسور وي.
خو نوموړي د ابادۍ او سمسورتيا تر څنګ د سولې هيله هم وکړه.
د کندهار ښار يوه بل اوسېدونکی محمد سليم بيا د واروې اورېدو په خوښۍ کې پر خپل موټر د واورې سړی جوړ کړی و او له ملي بيرغونو سره يو ځای يې پرې دا شعار ليکلی و چې: ((موږ سوله غواړو.))
ده پژواک اژانس ته وويل، د واورې اورېدل یې په هېواد کې د سولې لپاره هم په نېک فال نيولې ده.
دی وايي: ((موږ نور له جګړو او ناخوالو ستړي يوو او دومره يې ځپلي يوو چې ټولې هيلې يې را په کې مړې کړي دي، د خدای دربار ته دعا کوو چې د همدې واورې په برکت په ټول هېواد کې نه يوازې کال اباد وي، بلکې جګړه او وژنه هم پای ته ورسېږي.))
بل خوا د کندهار باغ لرونکي، کروندګر او مالداران هم د واورې اورېدو خوشاله کړي او وايي سږ کال به يې کرنيز محصولات ښه وي.
د ارغنداب ولسوالۍ د سرکاری باغ اوسېدونکي محمد ظاهر چې د انارو باغ لري، پژواک ته وويل، په تېرو کلونو کې په کندهار کې ډېر کم اورښت کېده او پر پله پسې وچکالي وه.
خو دی وايي سږ کال نه يوازې تر دې مهاله کافی باران شوی، بلکې نن واوره هم اورېدله چې د يوه سمسور کال لپاره يې د دوې هيلې ډېرې کړي دي.
ده وويل، د اورښتونو له پيلېدو سره په دهلې بند کې د اوبو کچه ډېره شوې چې د دې ولايت د ډېرو باغونو او کروندو د اوبه کولو يوازينۍ سرچينه ده.
ظاهر وايي، له اورښت وړاندې په دهلې بند کې ډېرې کمې اوبه وې، په داسې حال کې چې د ژمنیو کښتونو لپاره اوبو ته سخته اړتيا وه.
د ده په خبره، اوسنيو پيل شوو اورښتونو هم په ژمي کې د باغ لرونکو او کروندګرو د اوبو اړتيا پوره کوي او هم د یوه اباد کال لپاره د خلکو هيلې ډېروي.
نوموړی دغه راز يادونه کوي چې که د کال په اوږدو کې نور باران هم وشي نو تر ځمکې لاندې به د اوبو کچه بيرته راپورته شي چې په دې وروستيو کې د وچکالۍ له امله کښته تللې وه.
در محمد کوچی چې له خپلې کورنۍ سره يو ځای د دامان ولسوالۍ په دښتو کې په کږديو کې اوسي، وايي پر له پسې وچکاليو په دې ولايت کې مالداري هم له ګواښ سره مخ کړې وه او کوچيان يې زيانمن کړي وو.
دی وايي، ډېر پخوا چې کلونه اباد وو نو هر کوچي به د سلګونو پسونو، ميږو او وزو رمې لرلې خو د وروستيو کلونو وچکاليو هغوی سخت وځپل.
خو نوموړی اوس خوشحاله ښکاري او وايي چې له اورښتونو او وارې سره به کال اباد شي، ورشوګانې او دښتې به شنې شي او کوچيان به بيا د دې جوګه شي چې رمې وساتي او مالداري بيرته په پښو ودرېږي.
د کندهار د کرنې رياست د ترويج مدير انجنير محمد الله نوري پژواک خبري اژانس ته وويل، نن په دې ولايت کې څو ساعته واوره اورېدلې چې کچه يې له ۴ سانتي متره ډېره ده، خو کندهار ته په نژدې سيمو کې ان ۳۰ سانتي متره واوره شوې ده.
دی هم وايي چې په دې ولايت کې په دومره کچه واوره ۲۴ کلونه وروسته اوري.
د ده په خبره، څلورويشت کاله وړاندې په ۱۹۹۲ کال کې هم په ورته توګه واوره اورېدلې وه، خو له هغه وروسته بيا په کندهار کې دومره واوره نه وه شوې.
ده يادوه وکړه چې په روان کال کې تر دې دمه کافي بارانونه هم شوي چې کچه يې ۱۲۰ ملي متره ته رسېږي.
خو نوري وايي، چې د وچکالۍ د ختمولو لپاره شاوخوا ۲۰۰ ملي متره او په بشپړه توګه د يوه ابادا او سمسور کال لپاره له ۴۰۰ تر ۴۵۰ ملي متره باران ته اړتيا ده.
هغه تمه وښودله چې د ژمي شاوخوا يوه نيمه مياشت موده نوره هم پاته ده او هيله يې دا ده چې نور باران به هم وشي.
ده هم په اوسني موسم کې د بارانونو او واورې اورښت د کرنې، مالدارۍ او سمسورتيا لپاره ډېر ګټور وګاڼه.
دی وايي، کندهار وچ دښتي اقليم لري چې له ورښت سره به نه يوازې د خلکو باغونو او کښتونو ته ډېره ګټه ورسېږي، بلکې په دهلې بند کې به هم د اوبو کچه هم لوړه شي چې د دې ولايت د اوو ولسواليو ځمکې او باغونه خړوبوي.
د کندهار د ٧٠ سلنه اوسېدونکو ژوند پر کرنه او مالداري ولاړ دى خو په تېرو کلونو کې د بارانونو نشتوالي او د اوبو کمښت د خلکو د ژوند دغه مهمه وسيله زيانمنه کړې وه.
غړيYou need to subscribe to view the full article. Please login or register a new account.
