جلال اباد (پژواک، ١٩ سلواغه ٩٥): د نورستان والي وايي چې د دغه ولايت په ځینو سيمو کې د واورې ښویېدنې او سړو له امله د مړه شوو کسانو شمېر ٨٣ ته لوړ شوی او دغه راز ۲۷ ټپيان هم را ايستل شوي دي.
والي حافظ عبدالقيوم د سلواغې په ١٩مه پژواک خبري اژانس ته وويل چې پرون د مرستو لومړۍ ډله برګمټال ولسوالۍ ته رسېدلې ده.
هغه وايي، د سلواغې په ۱۷مه شپه د برګمټال ولسوالۍ افسې کلی چې نږدې ۷۰ کورونه په کې وو، تر واورې لاندې شوي چې لا يې هم د څلور سوه په شاوخوا کې خلک تر واورو لاندې دي.
د نوموړي په وينا، تر پرون سهار يې د ۲۰۱ سېلاب قول اردو د الوتکو په مرسته لومړنۍ مرستې او يو روغتيايي ټېم سيمې ته لېږلي او هلته د ژغورنې عمليات دوام لري.
د نورستان والي وويل، تر پرون مازديګر پورې يوازې په برګمټال ولسوالۍ کې له واورو د را ايستل شوو جسدونو شمېر ۶۳ او د ټيپانو شمېر ۲۷ تنو ته رسېدلی دی.
د حافظ عبدالقيوم په وينا، دغه راز د دغه ولايت په منډول ولسوالۍ کې هم په دوو پېښو کې ١٠ کسان مړه او يو شمېر نور ټپيان شوي دي.
د نورستان د ولايتي شورا رييس سعدالله پاينده زوی هم له پژواک اژانس سره د خبرو پر مهال د مړو او ټپيانو یاده شمېره وښوده؛ خو ټينګار يې درلود چې هلته باید د بېړنيو مرستو سربېره نورې مرستې واستول شي.
د پاينده زوی د معلوماتو له مخې، په سيمه کې بشري ناورين ته ورته پېښه رامنځته شوې او په لږو مرستو د ځايي خلکو درد نه دوا کېږي.
په ختيځ کې د ۲۰۱ سېلاب قول اردو چارواکي هم وايي چې پرون یې برګمټال ولسوالۍ ته د لومړنيو مرستو او درملو بار يوه الوتکه استولې ده.
د يادې قول اردو په خبرپاڼه کې چې پژواک اژانس ته يې را استولې، ويلي چې په الوتکه کې د اردو د پرسونل اړوند يوه روغتيايي او ژغورونکې ډله هم ساتول شوې ده.
غړيYou need to subscribe to view the full article. Please login or register a new account.
