دا راپور واورئ
۰:۰۰ / ۱:۰۰
فيض اباد (پژواک، ١٦ ورى ٩٦): د بدخشان ځايي چارواکي وايي چې د دغه ولايت په خواهان ولسوالۍ کې د غره ښويېدنې له امله د استوګنې څلور کورونه په بشپړ ډول ويجاړ شوي، يو کس مړ شوى او دوه نور ژوبل شوي دي.
د یاد ولایت له پېښو سره د مبارزې ادارې مشر عبدالله همايون پژواک خبري اژانس ته وويل چې دغه طبيعي پېښه نن سهار د خواهان ولايت په دو درګي کلي کې رامنځته شوې ده.
هغه زياته کړه چې له غره نه د سګو او ډبرو د را ښويېدو له امله د استوګنې څلور کورونه ويجاړ شوي، يو تن مړ شوى او دوه نور ژوبل شوي دي.
د بدخشان له پېښو سره د مبارزې ادارې مشر وويل چې له اړمنو ته د کمپلو، خېمو او نورو اړينو توګو په استولو سربېره، له رياست او همکارو موسسو نه جوړه ډله، زيانمنو ته د مرستو رسولو لپاره د پېښې ځاى ته استول شوې ده.
