ګردېز کې د موټرو ټکر له امله ۱۱ کسان ټپیان شوي

ګردېز (پژواک، ١٦ سلواغه ٩٦): په ګردېز ښار کې د يوې ترافيکي پېښې له امله د دوو ماشومانو په ګډون ١١ کسان ټپيان شوي دي.

د پکتيا په مرکز ګردېز کې د ملکي روغتون سرطبيب ډاکتر اصيل خان د سلواغې په ١٦مه پژواک خبري اژانس ته وويل چې نن له غرمې مخکې شاوخوا لس بجې د بلند منزل ښارګوټي په سيمه کې ترافيکي پېښه شوې ده.

هغه وويل چې په دې پېښه کې د دوو ماشومانو په ګډون ١١ تنه ټپيان شوي دي.

د ډاکتر اصيل خان په وينا، د ټپيانو روغتيايي حالت د ډاډ وړى دى.

د يادې پېښې يوه عيني شاهد محمد يوسف پژواک ته وويل چې دغه پېښه د دوو سراچه موټرو د ټکر له امله رامنځته شوې ده.

هغه وايي چې په دې پېښه کې څو تنه ټپيان شوي چې روغتون ته لېږدول شوي دي.

د يادونې ده، ډېرى وخت دغه شان پېښې د موټر چلوونکو د بې احتياطۍ له رامنځته کېږي.

You need to subscribe to view the full article. Please login or register a new account.