کابل (پژواک، ٢٩ کب ٩٦) : د چين سفير افغانانو ته د نوي کال د مبارکۍ ورکولو ترڅنګ ويلي چې د هېواد مشرتابه تل هڅه کړې چې په افغانستان کې د سولې د خبرو اترو لپاره ګټورې لارې ولټوي.
د چين سفير ليوجين سانګ دا څرګندونې د نوي کال په مناسبت افغانانو ته د مبارکۍ په پيغام کې کړې دي.
هغه د مبارکۍ ترڅنګ هيله څرګنده کړې چې نوى کال افغانانو ته د سولې، ثبات او پرمختګ زيري له ځانه سره ولري او له کورنيو مشکلاتو څخه ووځي.
نوموړي زياته کړه چې چين او افغانستان ددولتونو او ولسونو په کچه ٦٠ کلنه ملګرتيا او دوستي لري او دې ته به ادامه ورکوي.
د هغه په وينا، د ورېښمو لاره او د يوې لارې يو کمربند پروژو سر به ددواړو هېوادونو ولسونه نور هم سره نږدې کړې، ځکه چې ګټې يې سره شريکې دي.
بلخوا د چين سفير ليوجين سانګ نن د مشرانو جرګې رييس فضل هادي مسلميار سره پر بېلا بېلو موضوعاتو خبرې اترې کړې دي.
د مشرانو جرګې له خوا په يوه خپره شوې خبرپاڼه کې راغلي چې په دې ناسته کې ليوجين سانګ د دواړو هېوادونو تر منځ د دوستانه او تاریخي اړیکو او ښه ګاونډیتوب څخه د يادونې تر څنګ وويل چې هېواد يې هیله لري ترڅو افغانستان د يو پرمختللي، باثباته او په خپلو پښو ولاړ هېواد په توګه په سیمه کې راڅرګند شي.
هغه زياته کړې :" زموږ د هېواد مشرتابه تل هڅه کوي چې په افغانستان کې د سولې د خبرو اترو لپاره ګټورې لارې وپلټي او هم د تېر په څېر به د افغانستان د پرمختيايي پروژو د پلي کېدو، د بيا رغونې او نوې رغونې په لارو کې خپلو مرستو ته دوام ورکړي. "
د چین سفیر همدا راز د ورېښمو لار د اهميت او د چين د خلق جمهوريت د نوي اقتصادي تګلارې او په اړونده هېوادونو د دې د مثبتو اغېزو په اړه څرګندونې وکړې او هم يې د دواړو هېوادونو د پارلماني اړيکو د پراخوالي او افغان محصلينو ته د تحصيلي بورسونو د ورکړې په برخو کې د مشرانوجرګې مشرتابه ته معلومات وړاندې کړل.
د مشرانو جرګې رييس په بېلا بېلو برخو کې د چين د ولسي جمهوريت له مرستو مننه کړې او دچين د ولسمشر په توګه د شي جينګ پينګ د بيا ټاکنې مبارکي يې ورکړه .
مسلميار زياته کړې :" باور لرم چې یاد هېواد به د افغانستان خلک چې له ترهګرۍ څخه رنځ وړي، له پامه نه غورځوي او ددوی لاس نیوی به کوي، ځکه تروريزم سيمه او نړۍ په جدي توګه له خطر سره مخ کړې ده."
هغه په دې ليدنه کې له ترهګرو څخه د پاکستان ملاتړ او د افغانستان په چارو کې يې لاسوهنې هم په ډاګه کړې او ويې ويل چې پاکستان په ترو څلورو لسيزو کې د افغانستان د خلکو د وژلو او ټولګټو پروژو د ویجاړولو په برخوکې له هر ډول کړکيچ څخه کار اخيستی او اخلي يې.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن