کندهار (پژواک، ٣ تله ۹۷): په کندهار کې به له وچکالۍ ځپلو زرګونو کورنیو، داخلي بې ځایه شوو، کډوالو، کونډو، یتیمانو او نورو بېوزلو کورنیو سره د خوراکي او نا خوراکي توکو مرستې وشي.
دغه څرګندونې له طبیعي پېښو سره د چمتووالي ریاست رییس مسعود پښتون د ولایت مقام په مطبوعاتي دفتر کې یوې خبري غونډې ته وکړې.
پښتون وویل، دا چې د کندهار اوسېدونکي وچکالۍ سخت ځپلي اړوند ریاست په پلان کې لري چې د مرستندویه ادارو په همکاري له اړو کورنیو سره مرستې وکړي.
هغه زیاته کړه، د خوړو نړیوال سازمان W.F.P په مالي ملاتړ په دریو برخو کې د مرستې لړۍ ترتیب شوې چې ژر به پيل شي.
دی وايي، په دې برخه کې یوه پروژه د هیلو په نوم مرستندویې ادارې ته ورکړل شوې چې له مخې به یې پر ۵ زره کورنیو اړین خوراکي توکي (اوړه، دال، غوړي او مالګه) ووېشل شي.
د ده په خبره، د دې مرستې ترلاسه کولو لپاره به د یوې سروې له مخې ۲زره اړې کورنۍ په کندهار ښار او ۳ زره کورنۍ په ولسوالیو کې انتخاب شي.
پښتون وویل، د مرستې لړۍ د دویمې پروژې قراداد د اریانا په نوم له بلې مرستندویه ادارې شوی چې د ۴۵۰۰ اړو کورنیو هرې یوې ته به د خوراکي توکو بدیل ۷زره افغانۍ ورکړل شي.
دی وايي، په دغو کورنیو کې وچکالۍ ځپلي، داخلي بې ځایه شوي، له ګاونډیو هېوادونو راغلي کډوال، کونډې، یتیمان او معلولین شامل دي.
د ده په خبره، د دغو کورنیو د پېژندلو په موخه له طبیعي پېښو سره د چمتووالي، اقتصاد او کډوالو ریاستونو ګډه سروې روانه ده.
د مرستې د درېیمې پروژې په اړه نوموړي وویل چې قرارداد یې له A.N.C.C ادارې سره شوی چې له مخې به یې د کندهار په ۱۷ ولسوالیو کې پر ۱۰ زره ۱۱۷ وچکالۍ ځپلو نورو کورنیو خوراکي توکي ووېشل شي.
ده خبر ورکړ چې د دغو مرستو د وېش په موخه سروې پیل شوې او تر راتلونکو دریو میاشتو به یې د وېش چارې هم بشپړې شي.
پښتون دغه راز یادونه وکړه چې له مرکزي ادارې یې له وچکالۍ ځپلو سره د مرستې غوښتنه کړې او ټاکل شوې ده چې ۳ زره ټنه غنم او ۳ زره پارسله وریجې هم په ولسوالیو کې پر وچکالۍ ځپلو کورنیو ووېشل شي.
نوموړي د دې تر څنګ په جګړو کې د وژل شوو پولیسو د ۹۰۰ کورنیو لپاره هم د غنمو د مرستې د منظورۍ خبر ورکړ چې هرې کورنۍ ته به ۲ سوه کیلوګرامه غنم ورکړل شي.
د دې تر څنګ هغه په تېره روژې میاشتې کې په کندهار ښار کې د یوې چاودنې د ۴۰ تنو قربانیانو لپاره هم د ۲،۶ میلیونه افغانیو د منظورۍ خبر ورکړ چې ډېر ژر به پرې ووېشل شي.
نوموړي په روان کال کې له بېوزلو او اړو کورنیو سره د شوو مرستو په اړه هم معلومات ورکړل او ویې ویل چې د کال له پيله بیا تر اوسه یې له ۷۶۹ کورنيو سره د ۱۲ قلمه خوراکي توکو او دغه راز له ۱۸۹ نورو کورنیو سره د یو شمېر موسسو په همکارۍ د خوراکي او غیر خوراکي توکو او نقدي مرسته کړې ده.
دی وايي، له طبيعي پېښو سره د مبارزې رياست خپلې هڅې چټکې کړې څو د اړو او غريبو هيوادوالو د ستونزو حل ته د امکان تر حده ځان ورسوي.
اړوند ریاست په داسې حال کې له وچکالۍ ځپلو سره د مرستې خبر ورکوي چې کندهار له ۷۰ سلنه وچکالۍ سره مخامخ دی.
د وچکالۍ له امله د کندهار په دهلې بند کې د اوبو کچه ۱۱۰ میلیونه متره مکعبه راکمه شوې چې د دې ولایت د ۷ ولسوالیو د باغونو او کروندو اوبولو یوازینۍ لویه سرچینه ده.
دغه راز په ډېرو سیمو کې تر ځمکې لاندې د اوبو کچه لسګونه متره ټیټه شوې چې نه یوازې د څښاک د اوبو د کمښت ستونزه یې پیدا کړې بلکې له امله یې زرګونه جریبه ځمکه له کرنې پاتې شوې او په ځینو سیمو کې یې بیا ۶۰ سلنه مالداري له منځه وړې ده.
غړيYou need to subscribe to view the full article. Please login or register a new account.
