کابل ( پژواک، ٤ مرغومى ٩٧) : د افغانستان، ايران او هندوستان ترمنځ د چابهار بندر د تړون د ارزونې د کمېټې لومړۍ غونډه وشوه.
د هندوستان د بهرنيو چارو وزارت له خوا د لېندۍ په ٤مه په يوه خپره شوې خبرپاڼه کې راغلي، دا غونډه چې پرون د ايران د سيستان بلوچستان ايالت په چابهار ښار کې ترسره شوه، په کې د يادو هېوادونو د اړوندو ادارو او وزارتونو استازو ګډون کړی و.
سرچينې زياته کړې چې په دې غونډه کې د چابهار تړون په اړه د شوو پرېکړو او تړونونو په اړه ارزونې وشوې.
بلخوا ايراني رسنيو خبر ورکړى چې په دې غونډه کې د چابهار بندر اړوند پروژو، د سوداګرۍ د پراختيا او د دغه بندر له لارې د نورو هېوادونو د نښلولو په اړه خبرې وشوې.
د يادونې ده، د دغه بندر تړون په ١٣٩٥ لمريز کال کې د افغانستان او ايران د ولسمشر او د هندوستان د لومړي وزير ترمنځ لاسليک شو.
login or register a new account.
