هلمند کې له سيلاب ځپلو کوچيانو سره مرستې وشوې

لښکرګاه(پژواک، ٢٨ کب ٩٧): هلمند کې د نادعلي او ګرشګ ولسواليو له سيلاب ځپلو کوچيانو سره د سلګونو ټنو حيواني خوراکي توکو مرستې وشوې.

د اړوندې موضوع په اړه جوړو شويو مراسمو ته د هلمند د کرنې رييس زلمي الکو وويل چې د نادعلي او ګرشک ولسواليو پر سيلاب ځپلو د ٢٠٨ ميټريک ټنه حيواني خوراکي توکو د وېش لړۍ نن پيل شوه.

هغه وايي: ((کوچيانو پرله پسې غوښتنه کوله چې څاروي يې خوراکي توکي نه لري نو ځکه موږ نن ورسره دغه مرسته وکړه.))

د نوموړي د معلوماتو له مخې، له دې توکو څخه ١٢٣ ټنه به يې په ګرشک او ٨٥ ټنه به يې په نادعلي ولسوالۍ کې پر کوچيانو ووېشل شي.

ده زياته کړه: ((دغه مرستې د يوه پلاوي له لوري په شفاف ډول پر مستحقو کسانو وېشل کيږي.))

يو تن مرسته اخيستونکي سردارمحمد پژواک ته وويل: ((زموږ مالونو د خوراک لپاره هېڅ هم نه درلودل، له دې مرستو ډېر خوښ يو.))

ده وويل چې د دغه ولايت په بېلابېلو سيمو کې سيلابونو خلک ډېر ځپلي دي، بايد اړينې مرستې ورسره ترسره شي.

همدارنګه د نادعلي ولسوالۍ اوسېدونکي اغا ګل کوچي پژواک ته وويل: ((په تېرو کلونو کې وچکالۍ ځپلو خو سږکال بيا سيلابونو سخت وځپلو، کورونه مو وران شوي او مالونه مو د خوراک لپاره څه نه لري.))

کوچى زياتوي چې دغه مرستې دوى ته بسنه نه کوي، اړوندې ادارې بايد د مرستو لړۍ جارې وساتي.

د يادونې ده چې هلمند کې د وروستيو ورښتونو او سيلابونو له امله لسګونو کسانو ته مرګ ژوبله واوښته، ٣٥٠٠ څاروي مړه شول، دوه زره کورونه او ١٠ زره جريبه ځمکه ويجاړه شوه.

غړي

You need to subscribe to view the full article. Please login or register a new account.