اسعداباد (پژواک، ١٠ چنګاښ ٩٨): د قيمتي ډبرو ځيني سوداګرو له حکومته غوښتنه وکړه چې د کانونو کيندنې او قيمتي ډبرو کاروبار زمينه په قانوني ډول برابره کړي.
د ننګرهار، کونړ، لغمان، نورستان او خیبر پښتونخوا يو شمېر سوداګر نن په کونړ ولايت کې راټول شوي وو او دغه څرګندونې يې وکړې.
د دغو سوداګرو له ډلې مولوي محمد اسماعيل وويل چې حکومت بايد داسې زمينه برابره کړي څو له بهره يو شمېر سوداګر افغانستان ته راشي او دلته د قيمتي ډبرو راکړه ورکړه وکړي.
دى وايي: ((په دغه کار سره هم حکومت ته ګټه رسېږي او هم خلکو ته د کار زمينه برابرېږي.))
ده ټينګار وکړ چې حکومت بايد د قيمتي ډبرو سوداګرو ته د ټکس په مقابل کې داسې کارتونه ورکړي چې په ټول هېواد کې د اعتبار وړ وي څو دوى وکولاى شي په اسانه خپل کاروبار وکړي.
دغه راز د ننګرهار قيمتي ډبرو د مارکېټ مشر حاجي مسکين وويل چې سوداګرو ته دې له سلا مشورې وروسته په کونړ کې د قيمتي ډبرو يو مارکېټ جوړ شي او تر څنګ دې یې په ټول هېواد کې د قيمتي ډبرو انتقال ازاد کړاى شي.
نوموړي وويل چې د قيمتي ډبرو د سوداګرۍ لپاره دې د حکومت له لوري ځانګړي اصول هم وضعه شي.
همدارنګه د خيبر پښتونخوا د مالګې منډوي يوه سوداګر حزب الله وويل چې د پاکستان د پېښور ښار په نمک منډوي کې زرګونه افغان سوداګر د قيمتي ډبرو کاروبار کوي.
هغه وايي: ((په دغه مارکېټ کې تر ټولو ښه او قيمتي ډبرې د افغانستان دي خو د افغانستان کاڼي د پاکستان په نوم نورو هېوادونو ته صادرېږي.))
ده وويل چې افغان حکومت بايد دغو سوداګرو ته زمينه برابره کړي څو د قيمتي ډبرو په برخه کې په افغانستان کې پانګونه وکړي.
يو شمېر نورو سوداګرو هم ورته څرګندونې وکړې.
د غونډې په پاى کې د کونړ والي عبدالستار ميرزکوال وويل چې په دغه ولايت کې د قيمتي ډبرو د پروسس او خرڅلاو مارکېټ جوړوي.
والي دا هم وويل چې په کونړ کې يو انسټيټیوټ جوړوي څو ځوانان د قیمتي ډبرو په برخه کې مسلکي زده کړې وکړي.
ده له يادو سوداګرو سره ژمنه وکړه چې د دوى غوښتنې به د يوې کمېټې له لارې تر اړوندو حکومتي چارواکو پورې رسوي.
د يادونې ده، د لومړي ځل لپاره په کونړ کې د قيمتي ډبرو د سوداګرو غونډه جوړه شوه.
غړيYou need to subscribe to view the full article. Please login or register a new account.
