کابل (پژواک، ٢٠ لړم ٩٨): په افغانستان کې د لومړي ځل لپاره له طبيعي ګازو د برېښنا د توليد دستګاه ازمايښتي فعاليت پيل کړى دى.
د کانونو او پټروليم وزارت له خوا د لړم په ٢٠مه په يوه خپره شوې خبرپاڼه کې راغلي چې دغه دستګاه د جوزجان په مرکز شبرغان ښار کې فعاله شوې ده.
سرچينې زياته کړې، له طبيعي ګاز څخه د برېښنا توليد ياده دستګاه چې د (۴۰) ميګاواټه برېښنا توليد ظرفيت لري او پانګونه يې د بيات پاور له خوا شوې، په ازمايښتي توګه يې د برېښنا په توليد پيل کړى دى.
دغه وزارت ويلي چې د یادې دستګاه توليدي برېښنا به د افغانستان د برېښنا شرکت له لارې د سرپل، جوزجان او فارياب ولايتونو زرګونه کورنۍ د برېښنا له عظیم نعمت څخه برخمنې کړي.
د کانونو او پټروليم وزارت وياند قدير خان متفي پژواک اژانس ته وويل پر يادې دستګاه ۱۲ ميليونه امريکايي ډالر پانګونه شوې چې د اسيا پراختيايي بانګ هم په کې مرسته کړې ده.
هغه زياته کړه، د کانونو او پټرولیم وزارت هڅه کوي چې د يادې پروژې په پلې کېدو سره په افغانستان کې له نورو طبیعي ګازو څخه هم د برېښنا د تولید په برخه کې ګټه واخلي.
د یادونې ده، نړیوال بانک د روان ۲۰۱۹ کال په اکتوبر میاشت کې په افغانستان کې له طبیعي زېرمو څخه د انرژۍ د تولید په برخه کې له دوو پروژو سره د مرستې په توګه د ۹۸.۸ ميليونه امریکايي ډالرو ورکولو منظورېدو خبر ورکړ.
دغه بانک ویلي چې له یادو پروژو یې هدف د داخلي منابعو له لارې د انرژۍ د تولید د کچې لوړول او د انرژۍ پر سکټور د خصوصي پانګونې هڅول دي.
برېښنا شرکت د معلوماتو له مخې، دا مهال افغانستان د خپلې اړتيا ۷۰ سلنه برېښنا له تاجکستان، ازبکستان او ترکمنستان څخه واردوي او ۳۰ سلنه برېښنا له خپلو داخلي منابعو څخه تولیدوي.
غړيYou need to subscribe to view the full article. Please login or register a new account.
