کابل (پژواک، ۱۸ کب ۹۸): د حکومت اجرایه ریاست وایي چې د ټاکنیزو ناندیو په اړه د سپېدار ماڼۍ او ارګ ګډو ناستو کومه پایله نه درلوده او له همدې امله عبدالله عبدالله سبا د لوړې مراسم ترسره کوي؛ ارګ هم د اشرف غني د لوړې مراسمو د ترسره کولو خبر ورکړی دی.
د یادونې ده چې دواړو ټاکنیزو ډلو د خپلو لوړو د مراسمو د ترسره کولو بلنلیکونه وېشلي دي.
د حکومت د اجرائیه ریاست ویاند امېد میثم نن پژواک خبري اژانس ته وویل، تراوسه یې چې له ارګ سره کومې ناستې لرلې؛ پایله یې نه ده ورکړې او ټاکل شوې د عبدالله عبدالله د لوړې مراسم سبا د کب په ۱۹ ترسره شی.
هغه زیاته کړه، د عبدالله عبدالله د لوړې مراسم په سپېدار ماڼۍ کې ترسره کېږي او شاوخوا اته زره کورني او بهرني مېلمانه به په کې ګډون کوي.
نوموړي وویل، د دغو مراسمو ترسره کول نهایي شوي او د ترسره کولو لپاره یې ټولې تیارۍ نیول شوې دي. ملېمنو ته د سهار په ۹ بجو بلنه ورکړل شوې ده.
بلخوا، «دولت جوړوونکي» ټاکنیز ټيم هم د محمد اشرف غني د لوړې مراسمو د مېلمنو لپاره بلنیکونه وېشلي دي.
ټاکل شوې ده چې دا مراسم د دوشبنې په ورځ د کب په ۱۹ په ارګ کې ترسره شي.
د ولسمشر د ویاند مرستیال درانۍ وزیري نن وویل، د محمد اشرف د لوړې په مراسمو کې چې د کب ۱۹ په ارګ کې ترسره کېږي، کورني او بهرني مېلمانه ګډون کوي.
هغه زیاته کړه: «د سبا ورځې د مراسمو د ترسره کولو لپاره ټول تیاری نیول شوی او ټاکل شوې ده چې په دغو شانداره مراسمو کې ډېر شمېر کورني او بهرني مېلمانه او د ټولنې د مخلتفو ډلو خلک ګډون وکړي او سبا د ملي جشن، د جمهوریت د بریا، ولسواکۍ او اساسي قانون ورځ ده.»
دا په داسې حال کې ده چې مېرمن وزیري تېره ورځ پژواک ته ویلي و چې دغه مراسم د دوشنبې ورځې په اته نیمو بجو پلېږي او له همدې امله په کابل کې عمومي رخصتي اعلان شوې ده.
بلخوا، د ولسي جرګې رییس میر رحمان رحماني د دغې جرګې په نننۍ ناسته کې وویل چې د «دولت جوړوونکي» او «ثبات او همپالنې» ټپمونو د لوړې د مراسمو بلنلیکونه یې ترلاسه کړي دي.
هغه وویل چې د یادې جرګې له غړو سره له مشورې وروسته به د یوه ټيم د لوړې په مراسمو کې د ګډون پرېکړه وکړي.
د بهرنیو چارو وزات ویاند ګران هېواد تېره ورځ پژواک خبري اژانس ته ویلي و چې د ولسمشر غني د لوړې په مراسمو کې د ګډون لپاره له کابل څخه ډېر شمېر چارواکي او دېپلوماتان بلل شوي دي.
ټاکل شوې چې وه د محمد اشرف غني د لوړې مراسم د کب په نهمه ترسره شي؛ خو دغه مراسم وځنډول شول. له هغې مخکې راپور ورکړل شوی و چې امریکا د یادو مراسمو د ځنډ غوښتنه کړې ده.
له هغې یوه ورځ وروسته ولسمشرۍ ماڼۍ په رسمي ډول ومنله چې د ولسمشر غني د لوړې مراسم ځنډول شوي دي.
په همدې حال کې د امریکا د بهرنیو چارو وزارت د محمد اشرف غني د لوړې د مراسمو د ځنډ په اړه د افغانستان د حکومت له پرېکړې مننه کړې وه.
د عبدالله عبدالله ټاکنیزې ډلې هم اعلان کړی و چې د افغان سولې لپاره د امریکا د ځانګړي استازي زلمي خلیلزاد په منځګړیتوب یې د لوړې مراسم او د والیانو معرفي کول ځنډولي دي. عبدالله عبدالله له هغه وروسته چې د ټاکنو پایلې یې ونه منلې، د بریا اعلان یې وکړ او ترواسه یې د څلورو ولایتونو لپاره ولیان معرفي کړي دي.
دا په داسې حال کې ده چې د ټاکنو خپلواک کمېسیون محمد اشرف غني د ولسمشر په توګه اعلان او نوموړي ته یې د ټاکنو د بریا وثیقه وسپارله.
غړيYou need to subscribe to view the full article. Please login or register a new account.
