پلخمري (پژواک، ۲۱ کب ۹۸): د بغلان د دهنه غوري ولسوالۍ اوسېدونکي شکايت کوي چې په تېرو څلورو کلونو کې په دې ولسوالۍ کې هېڅ پرمختيايي پروژه نه ده پلې شوې.
دوى وايي چې د پروژو د نه عملي کېدو له امله په بېلابېلو برخو کې له ګڼو ستونز سره مخ دي.
د يادې ولسوالۍ د پراختيايي شوراګانو مسوول ارباب امرالله د کب په ٢١مه د بغلان ولايت مقام له لوري د پروژو پلې کولو په اړه جوړې شوې غونډې ته وويل چې په تېرو څلورو کلونو کې په دهنه غوري کې يوه پرمختايي پروژه هم نه ده پلې شوې.
هغه وايي: ((که موږ ته چېرته وايي چې ولسوالۍ مو نه نا امنه ده کار په کې نه کېږي، نو په نورو ناامنو ولسواليو کې خير څنګه پروژې پلې کېږي.))
د همدې ولسوالۍ يوه بل اوسېدونکي شهاب الدين پژواک ته وويل چې په تېرو څو کلونو کې د دوى په ولسوالۍ کې پروژې نه دي پلې شوې.
ده وويل: ((د مکتب په برخه کې، د شفاخانې په برخه کې د لارو په برخه کې، په نورو ټولو برخو کې ستونزې لري، خو څوک راته پروژې نه عملي کوي.))
په ياده غونډه کې د بغلان والي د دفتر ريیس عبدالقدوس یزداني وويل چې په تېرو څلورو کلونو کې د دهنه غوري ولسوالۍ کنټرول له وسله والو طالبانو سره و، نو ځکه پروژې په کې نه دي پلې شوې.
خو دى وايي چې له دې وروسته به په دهنه غوري کې ډېر پروژې پلې شي.
بل لور ته په همدې غونډه کې د بغلان د حج او اوقافو رييس مولوي نقيب الله وويل چې د خلکو له خوښې سره سم په دغه ولايت پروژې نه پلې کېږي.
هغه وايي: ((نن موږ څومره ښه نظريات وړاندې کړل، خو د پروژو د تطبيق پر مهال زموږ دغه نظريات په پام کې نه نيول کېږي.))
د يادونې ده، په راتلونکي کال کې به د بغلان ولايت په بېلابېلو سيمو کې ٨٨ پروژې پلې شي.
غړيYou need to subscribe to view the full article. Please login or register a new account.
