کابل (پژواک، ۲۸ غبرګولی ۹۹) : د نړیوالې مالي ادارې (IFC) او د اړوندو دولتي او خصوصي ادارو ترمنځ د ۸۹ میلیون ډالرو په لګښت د افغانستان لپاره د انرژۍ تولیدولو پروژې تړون لاسلیک شو.
دغه تړون نن د غبرګولي په ۲۸مه، د نړيوالې مالي ادارې (IFC) له خوا چې د نړیوال بانک ګروپ د خصوصي سکتور د ودې څانګه ده، د افغانستان برېښنا شرکت چارواکو او افغان برېښنا تولید شرکت ترمنځ لاسلیک شو.
دا د افغانستان په شمال کې د دولت او خصوصي سکتور ترمنځ د برېښنا تولید ( په مزارشریف ښار کې له طبيعي ګازو څخه د برېښنا تولید کارخونې جوړول) لومړنۍ ګډه پروژه بلل کېږي. د مسوولین په وینا، دغه پروژه به د کورنۍ برېښنا تولیدولو وړتیا تر ۳۰ سلنې لوړه کړي.
د دې پروژې په پلي کېدو سره تمه کېږي، چې یو زیات شمېر خلک دايمي برېښنا ته لاسرسی ومومي.
د افغانستان برېښنا شرکت وایي، له بلې خوا د دې پروژې په پلي کېدو او د برېښنا تولید کارخونې له عملي کار پیل کېدو وروسته د ګاونډيو هېوادونو پر برېښنا به د هېواد د یوشمېر ولایتونو تکیه کمه شي او د ډيزلي جنراتورونو د برېښنا په پرتله، چې هم لوړه بیه لري او هم چاپېریال ته توان کوي، یو ښه بدیل ګڼل کېږي.
د برېښنا تولید د دې پروژې لومړني تاسیسات د ۵۹ میګاواټه برېښنا په ظرفیت او د ۸۹ میلیون امريکايي ډالرو په لګښت جوړيږي، چې په افغانستان کې د برېښنا تولیدولو په برخه کې د خصوصي سکتور اوږدمهاله او ستره پانګونه بلل کېږي.
سرچینې زیاته کړې، د افغانستان له ۳۷ میلیون نفوس څخه یوازې ۳۴ سلنه يې برېښنا ته دوامداره لاسرسی لري او دغه سلنه هم د برېښنا له پرې کېدو او پرچاويو څخه کړېږي، چې اکثره وخت په ورځ کې تر ۱۵ ساعته برېښنا پرې وي.
د آسیا پاسفیک سیمې د هېوادونو لپاره د نړيوالې مالي ادارې مرستیاله، مېرمن نینا استویل جیکویچ وايي: ”دا د افغانستان لپاره یوه حیاتي او برخلیک ټاکونکې پروژه ده. دا پروژه د ګاونډیو هېوادونو وارداتي برېښنا ته د افغانستان د اړتیاوو کمولو ته لار هواروي. "
د هغې په وینا، همدارنګه دغه پروژه نړيوالې ټولنې ته دا پیغام ورکوي، چې په افغانستان کې له خصوصي سکټور سره نړيوال بانکي تړونونه لاسلیک کېدای او پلي کېدای شي.
په اوس وخت کې افغانستان د خپلې برېښنا ۷۵ سلنه اړتیا له وارداتي برېښنا پوره کوي.په مزارشریف ښار کې له طبيعي ګازو څخه د برېښنا تولیدولو پروژه برېښنا ته د افغانستان اړتیا له سیمه ییزو ګازو څخه پوره کوي.
همدارنګه، دغه پروژه ۲۰۰ کسانو ته په مستقیمه توګه او یو زیات شمېر کسانو ته په غیر مستقیمه توګه د کارموندنې زمینه برابروي.
د افغانستان برېښنا شرکت اجراييوي رییس، داوود نورزی، د دې پروژې په اړه وايي: ”دغه پروژه نه یوازې دا چې برېښنا ته د خلکو لاسرسی زیاتوي، بلکې نورو شرکتونو په ځانګړې توګه خصوصي پانګوالو ته یوه غوره بېلګه ده، چې په دې سکتور کې پانګې اچونې ته د هغوی پام را واړوي.
ده زیاته کړه، دغه پروژه چې په خپل ذات کې د برېښنا په سکتور کې لومړنۍ بنستیزه پروژه ده، په مستقیمه توګه له بهرنۍ او خصوصي پانګونې څخه ګټې اخيستنه زیاتولی شي او د افغانستان انرژۍ په برخه کې یوه نوې لار پرانیستلی شي.
دغه پروژه د افغان برېښنا تولید شرکت له خوا، د غضنفر ګروپ او د حسن علم شرکت سره په مشارکت،پلې کېږي.
د غضنفر ګروپ رییس، اسماعیل غضنفر، د دې پروژې په اړه وايي:” شپږ کاله وړاندې موږ په نړیوالې مالي ادارې (IFC) کې په یوه غونډه کې د افغانستان د پراختيا لپاره لارې لټولې، هغه ځای چې په مزارشریف کې له طبيعي ګازو څخه د برېښنا تولیدولو پروژه په کې وزېږېده. اوس، شپږ کاله وروسته موږ دا تاريخي تړون لاسلیکوو، چې د روغتيا، زده کړو او صنعت په برخه کې د افغانستان د پراختيا او پرمختیا لپاره یوه خورا ارزښتمنه ملي پروژه بلل کېږي. د یوه پرمختللي افغانستان لپاره دا د غضنفر ګروپ لومړنۍ پانګه اچونه ده، چې د انرژۍ د تولید په برخه کې يې کوي.“
د مزارشریف د زرغونې انرژۍ تولید کارخونه به د شبرغان له ګازو څخه په هماغه قرارداد شوې حوزه کې ګټه پورته کوي. داسې اټکل کېږي، چې دا پروژه به هر کال په منځنۍ کچه ۴۰۰ ګیګاواټ ساعته برېښنا د مزارشریف ښار، کابل او جلال اباد ښار اوسېدونکو ته تولید کړي. همدارنګه، دا پروژه کولی شي، چې په هېواد کې د تجدید کېدونکو انرژیو لکه لمریزې برېښنا او بادي برېښنا پروژې هم ګړندۍ کړي.
غړيYou need to subscribe to view the full article. Please login or register a new account.
