کابل(پژواک،۲ لیندۍ ۹۹): د مشرانو جرګې یو شمېر غړو له تاجکستان سره د بدخشان د شپږو هم سرحده ولسوالیو د سقوط ګواښ کړی او ویلي یې دي چې د ولسوالیو لاس په لاس کېدل د وسله والو مخالفینو د تقویې لامل ګرځي.
تېره اوونۍ وسله والو طالبانو د بدخشان ولایت د مایمي ولسوالۍ د سقوط او د دې ولسوالۍ د امنیه قوماندان په ګډون د یو شمېر سرتېرو د وژلو او ټپي کېدو خبر ورکړی و.
د مشرانو جرګې په نننۍ ناسته کې د بدخشان د امنیتي وضعیت په اړه بحث وشو.
په دې جرګه کې د بدخشان د خلکو استازې ګلالۍ اکبري وویل، له تېرو دوو اوونیو راهیسې د بدخشان امنیتي وضعیت خراب شوی او تېره اوونۍ د ناغېړۍ په پايله کې ۳۰ هغه سیمه ییز کادرونه چې ددې ولسوالۍ د امنیتي سرتېرو په چوکاټ کې یې دندې درلودې ووژل شول.
هغې زیاته کړه: ((طالبانو د ولسوالۍ هرڅه له ځان سره یوړل، خلک بېځایه شول خو مرکزي حکومت د ګواښونو په اړه د سیمه ییزو چارواکو د راپور سربېره هم اقدام ونه کړ او مایمي سرحدي ولسوالۍ سقوط وکړ، د ولسوالۍ او امنیتي پوستو سقوط د دښمن د تقویې سبب کېږي. طالبانو له ځان سره کافي اندازه وسلې او مهمات وړي چې له هغو څخه به د امنیتي سرتېرو پر وړاندې استفاده وکړي.))
د نوموړې په خبره، یو شمېر ولسوالۍ په ځانګړې توګه ددغه ولایت سرحدي ولسوالۍ د سقوط له خطر سره مخ دي او که پلان ورته جوړ نه شي یادې ولسوالۍ به هم سقوط وکړي.
د جرګې بل غړي کامل بېک حسیني وویل: ((بدخشان ولایت د سقوط له خطر سره مخ دی، په ځانګړې توګه له تاجکستان سره ددغه ولایت شپږ ولسوالۍ به سقوط وکړي.))
نوموړي زیاته کړه، مرکز ته د اطلاح سربېره هېڅ ډول اجراات ترسره نه شول، څو تدابیر ونیول شي او مرستندوی سرتېري ولېږل شي.
د مشرانو جرګې لومړي نایب محمد علم ایزدیار هم د بدخشان د امنیتي وضعیت د خرابېدو په اړه اندېښنه څرګنده کړه او د هېواد له امنیتي او دفاعي سرتېرو یې وغوښتل چې د یوې سیمې له سقوط مخکې لاس په کار شي، ځکه دده په خبره د سیمو لاس په لاس کېدل د وسله والو مخالفینو د تقویې سبب کېږي.
هغه وویل، بدخشان ولایت له پاکستان او تاجکستان سره د سرحد او بېلا بېلو کانونو د لرلو له امله د طالبانو د تمویل سرچینه ده او حکومت یې باید د امنیت د ټینګښت او ګواښونو د مخنیوي په برخه کې اقدام وکړي.
د مشرانو جرګې رییس فضل هادي مسلمیار هم وویل، د بدخشان جغرافیايي موقعیت ته په کتو باید حکومت د دغه ولایت د امنیت ټينګښت لپاره جدي تصمیم ونیسي.
هغه زیاته کړه،: ((د بدخشان ولایت یو شمېر استازي ماته هم راغلي وو څو یې غږ ولسمشر ته ورسوم، له همدې ځایه په حکومت غږ کوم چې د بدخشان د وکیلانو او مشرانو له نفوذ څخه په استفاده د دغه ولایت د امنیت ټينګښت لپاره هڅې وکړي او د بدبختیو مخه ونیسي.))
دده په خبره، ناغېړي د یوې ولسوالۍ د سقوط لامل شوې او باید نوره تکرار نه شي.
نوموړي د جرګې له غړو په ځانګړې توګه په یاده جرګه کې د بدخشان له دوو استازو سره ژمنه وکړه چې اندېښنې به یې ولسمشر ته رسوي.
دا په داسې حال کې ده چې ملي دفاع وزارت نن په یوه خبرپاڼه کې ویلي و چې د بدخشان مایمي ولسوالۍ یې د طالبانو له وجوده پاکه کړې ده.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن