میمنه (پژواک،۲۶مرغومى ۹۹): د فارياب په زندان کې د بنديانو د خپلمنځي نښتې له امله يو بندي وژل شوى او پنځه نور ټپيان شوي دي.
د فارياب د پوليسو وياند عبدالکریم یورش پژواک اژانس ته وويل چې دغه پېښه تېره ورځ له غرمې وروسته هغه مهال رامنځته شوه چې په زندان کې د بنديانو ترمنځ لفظي شخړه پيدا شوه.
د نوموړي په خبره، په دغې پېښه کې يو بندي وژل شوى او پنځه نور ټپيان شوي دي.
د يورش په خبره، بنديانو پلان درلود چې د زندان دروازه ماته کړي او وتښتي، خو د زندان ساتونکو د دغه کار مخه ونيوله .
يوه بله باوري سرچينه چې نه غواړي په ګزارش کې يې نوم خپور شي وايي چې په زندان کې د دوه ګروپونو بنديانو ترمنځ نښته شوې ده.
سرچينې وويل چې نښته هغه مهال رامنځته شوه چې د يوه ګروپ يو هلک هغه بل ګروپ ته لاړ.
دده په خبره، وژل شوى کس عارف نوميده چې د قتل په تور بندي و.
د سرچينې په وينا، چې په دې نښته کې ١٥کسان ټپيان شوي چې زياتره يې د پوليسو پر ډزو ټپيان شوي دي، خو د فارياب پوليس په دې اړه څه نه وايي.
Visits: 148
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن