هرات(پژواک، ۲۶ مرغومى۹۹): مسوولين وايي چې په هرات کې د ترافيکي پېښې له امله پنځو کسانو ته مرګ ژوبله اوښتې ده.
د هرات د والي وياند جیلاني فرهاد پژواک اژانس ته وويل چې تېره ورځ ماښام مهال د هرات- تورغنډۍ پر لاره د “کمرکلاغ” په سيمه کې فلډر او خاور موټرو سره ټکر کړى دى.
دده په خبره، چې په دې پېښه کې يو ماشوم، يوه ښځه او يو نارينه مړه شوي او دوه نور نارينه ټپيان شوي دي.
سرچينې وويل چې د يوتن روغتيايي حالت نازک دى .
د والي وياند وايي چې د پېښې ټول قربانيان د فلډر موټر سپرلۍ دي.
د موټرو ګړندى تګ، د ترافيکي مقراراتو نه مراعت او د لارو خرابوالى ددغه ډول پېښو لامل بلل کيږي.
