خوست ښار (پژواک، ۲۲ سلواغه ۹۹): د خوست ګمرک مس,ولين وايي چې په روان مالي کال کې يې په عوايد کې د تېر کال په پرتله څه باندې دوه چنده ډېروالی راغلی دی.
د دغه ولايت د ګمرک رييس محمدحکيم سرتېر منګل پژواک خبري اژانس ته په ځانګړې مرکه کې وويل چې تېر کال د ماليې وزارت د ګمرکونو لوی رياست له خوا دوی ته يو ميليارد افغانۍ هدف ورکړل شوی و.
هغه زياته کړه چې که څه هم حالت کرونايي و او د درېیو مياشتو لپاره دغه ولايت ته پر واردېدونکو سواداګريزو مالونو د غلام خان لار تړل شوې وه، خو دوی بيا هم له ټاکلي هدفه ۲۶ ميليونه افغانۍ ډېرې راټولې کړې.
منګل وايي چې سږ کال يو ميليارد او ۳۶۳ ميليونه افغانۍ هدف ته ورکړل شوی، خو تېر کال ته په کتو تر دې دمه د دوی په راټول شوو عوايدو کې څه باندې دوه چنده ډېروالی راغلی دی.
هغه زياتوي: ((د مالي کال له پيله تر اوسه پورې چې يو مياشت او ۱۹ ورځې تېريږي، موږ له هدف سره سم مخې ته تللي يو. تېر کال په همدومره ورځو کې مثلاً د دلوې تر ۱۹مې نېټې پورې ۸۶ ميليونه افغانۍ راټولې شوې وې، سږ کال خوشبختانه د مالي کال له پيل نه د دلوې تر ۱۹مې ۱۸۶ ميليونه افغانۍ راټولې شوې دي. د فيصدي په لحاظ که وښيو، د تېر کال په پرتله زموږ عوايد ۱۱۷ فيصده لوړ تللي دي.))
نوموړی د عوايدو ډېرېدو عمده لاملونه دغه ولايت ته په قاچاقي لارو پر واردېدونکو سوداګريزو مالونو بنديز، پر سوداګريزو مالونو سل په سله د تعرفې عملي کول او د ګمرک په اداره کې د شفافيت رامنخته کېدل په ګوته کوي.
هغه وويل، هڅه يې دا ده سوداګرو ته ټولې هغه اسانتياوې برابرې کړي چې د عوايدو په شفافيت او راټولولو کې اغېزناک تمامېږي.
منګل زياته کړه: ((د دوی کارونو ته مو په وخت رسيده ګي کړې ده، دوی ته د شپې تر ناوخته پورې موږ کار کوو، حتی سرحدي ګمرک د جمعې په ورځ د شپې تر ۱۲ بجو پورې کار کړی. څو چې بار په ګمرک کې ولاړ وي، موږ کار ورته کړی او دا علت دی چې هم زموږ عوايد ډېر شوي او هم مو د دوی رضايت لاسته راوړی.))
د خوست ګمرک رييس زياته کړه، د ببرک تاڼې، شينکۍ او ليژه هغه لارې دي چې له پاکستانه پرې دغه ولايت ته په قاچاقي ډول سوداګريز مالونه راتلل.
د نوموړي په وينا، په اوس وخت کې دا قاچاقي لارې تړل شوې دي او يواځې د غلام خان بندر لار د سوداګريزو مالونو پر مخ پرانيستل شوې ده.
نوموړی زياتوي: ((که هغه لارې د پخوا په څېر خلاصې وای، ښايي موږ اوس دغه هدف ته چې رسېدلي يو، نه وای رسېدلي، ځکه تجار اکثره هغې لارې ته کوشش کوي چې ده باندې يا محصول رانه شي يا کم محصول پرې راشي، څو دوی زيات مفاد ترلاسه کړي. له کله چې هغه لارې بندې دي، دوی مجبور دي په همدې يوه لار چې د غلام خان لار ده، خپل مالونه را واړوي.))
د ګمرک رييس محمدحکيم سرتېر منګل وايي، په اوسط ډول دغه ولايت ته هره ورځ د غلام خان بندر له لارې په سوداګريزو مالونو بار ۹۰ موټر را اوړي.
هغه وويل، د دې لارې د رسمي ترانزيټ په اړه پاکستاني چارواکو موافقه کړې او په وينا يې، ښايي په نږدې راتلونکي کې دغه لار د ترانزيټي مالونو د تګ راتګ پر مخ هم پرانيستل شي.
ده زياته کړه: ((د ترانزيټ موضوعات نهايي کيدو ته رسيدلي دي، که څه هم موږ درې مياشتې پخوا څخه اماده يو چې که ترانزيټي محمولې راځي، موږ کولی شو طۍ مراحل يې کړو، په دې لنډو ورځو کې انشاالله ښه خبرونه شته، امکان ددې شته چې ترانزيټي محمولې راشي او په دې لار تېرې شي، په هغې سره بيا موږ ويلی شو چې عوايد به فوق العاده ډېر لوړ شي.))
نوموړی په دې عايداتي اداره کې د شفافيت په اړه هم ډاډ ورکوي او زياتوي، له کله نه چې دی د خوست د ګمرک رئيس په توګه ټاکل شوې، د فساد پرضد يې جدي مبارزه پيل کړې او وايي تر اخره به دوام ورکوي.
