کابل (پژواک، ٢١ غويى ١٤٠٠) : په هندوستان کې د افغانستان سفارت وايي چې د کرونا ويروس له امله په دغه هېواد کې ١٨٥ افغانان مړه شوي دي.
په نوي ډيلي کې د افغانستان د سفارت کلتوري آتشه اجمل عالمزي د غويي په ٢١مه، پژواک اژانس ته وويل چې د کرونا له امله د هندي وګړو ترڅنګ افغانان هم زيانمن شوي دي.
هغه زياته کړه، تراوسه په دغه هېواد کې تر دوه زرو ډېر افغانان پر کرونا اخته او شاوخوا ١٨٥ تنه له کرونا څخه مړه شوي دي.
عالمزي وويل چې تر اوسه ٢١ افغان کډوال، دوه افغان محصلين او ١٦٢ افغان سيکان او هندوان د کرونا له امله مړه شوي دي.
نوموړى وايي چې د افغانستان سفارت په بېلا بېلو برخو کې هڅه کوي، څو هلته له مېشتو افغانانو سره مرستې وکړي.
د هغه په وينا، دوى له مرکز سره په اړيکه کې دي چې څه ډول له افغانانو سره مرستې وشي، د عامه پوهاوي په برخه کې يې فعاليتونه کړي او افغانانو ته يې د واکسين او درملو په رسولو کې هم تر خپله وسه کار کړى دى.
عالمزی وایي چې تر ۴۰۰ زایاتو کورنیو ته یې د روغتیاي او خوراکي موادو د مرستې زمینه هم برابره کړې ده.
د افغان سفارت کلتوري اتشه وويل، دوى هڅه کوي چې په نوي ډيلي کې د افغانانو لپاره يو ځانګړى روغتيايي مرکز هم جوړ کړي.
د يادونې ده، چې په هندوستان کې د کرونا وبا په تېزۍ سره د خپرېدو په حال کې ده، هره ورځ تر ٤٠٠زره کسان پرې اخته او څلور زره یې له امله مړه کېږي.
تر اوسه هندوستان کې شاوخوا ٢٣ ميليونه کسان پر کرونا اخته او تر ٢٤٠زره کسان مړه شوي دي.
Visits: 231
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن