<p style="text-align: justify;">کابل (پژواک، ۲۳ غویی ۱۴۰۰): ولسمشر غني وايي چې ډېر ژر به د سولې پروسې په اړه سیمه ییزه اجماع جوړه شي او ټینګار یې وکړ چې طالبان باید د سولې له رامنځته شوي فرصته اعظیمي استفاده وکړي.</p>
<p style="text-align: justify;">ولسمشر محمد اشرف غني چې نن پنجشنبې یې د کوچني اختر په مناسبت ارګ کې خبرې کولې، وویل چې بهرني ځواکونه د وتلو په حال کې دي او د افغانستان خلک هم پر سوله بشپړه اجماع لري.</p>
<p style="text-align: justify;">هغه وویل: ((ډېر ژر به د افغانستان سولې پروسې په اړه د سیمه ییزې اجماع شاهدان و اوسو او له افغانستانه سیمه ییز ملاتړ د پراخېدو په حال کې دی.))</p>
<p style="text-align: justify;">ولسمشر غني وايي چې طالبان باید د افغانستان سولې لپاره له رامنځته شوي لویه فرصته ګټه واخلي؛ ځکه بیا به دغسې فرصت د هغوی لپاره رامنځته نه شي.</p>
<p style="text-align: justify;">غني د طالبانو د مشر ملا هبت الله د اختر پیغام غبرګون کې له هغه وغوښتل چې د پیغام له صادرولو او له خلکو د تسلیمۍ له غوښتنې مخکې باید د دغه هېواد تاریخ مطالعه کړي.</p>
<p style="text-align: justify;">هغه زیاته کړه: ((طالبان باید انتخاب ولري؛ ځکه زموږ انتخاب دا دی چې د هېواد اوسنۍ ستونزې یوازې د خبرو له لارې حل لاره لري، جګړه نه شي کولی ستونزه حل کړي.))</p>
<p style="text-align: justify;">هغه څرګنده کړه چې له افغانستان د بهرنیو ځواکونو وتل د دغه هېواد معاصر تاریخ کې لوی فرصت دی او د ملي حاکمیت ټینګښت په هر اړخیز او بشپړ ډول ترسره کېږي.</p>
<p style="text-align: justify;">هغه وویل: ((بشپړ باور ولرئ چې نړیوالې همکارۍ په ښه ډول تنظیمېږي. د اسیا زړه کې د افغانستان د کلیدي رول تحکیم لپاره سیمه ییزې اجماع چټکتیا پیدا کړې ده.))</p>
<p style="text-align: justify;">غني وویل: ((زموږ خلک پوهېږي چې څوک د ځانمرګو بریدونو او چاودنو مسوول دي، موږ ویجاړی نه غواړو، موږ پراختیا غواړو.))</p>
<p style="text-align: justify;">غني وايي چې د پاکستان لوی درستیز په پوره وضاحت اعلان کړه چې د اسلامي امارت بیا راژوندی کېدل د پاکستان د ملي ګټو په ګټه نه دی؛ ځکه نو له جمهوریته خپل ماتړ اعلانوي.</p>
<p style="text-align: justify;">ولسمشر په هېواد کې د کرونا ویروس درېیم موج په اړه وویل چې اوس په هېواد کې د یاد ویروس درېیم موج پیل شوی او له خلکو یې وغوښتل چې روغتیايي لارښوونې، په ځانګړي ډول د اختر په ورځو کې په پام کې ولري.</p>
<p style="text-align: justify;">د یادونې ده چې حکومت او طالبانو د اختر درې ورځې په مشروط ډول اوربند اعلان کړی دی.</p>
