جلال اباد (پژواک، ۲۹ غويی ۱۴۰۰): په ننګرهار کې د ملګرو ملتونو د کډوالو ادارې يا UNHCR په ۱۶ ميليونه افغانۍ مرسته د نجونو د يوې لېسې لپاره دوه پوړيزه ودانۍ جوړه شوه.
مسوولين وايي، د دغه ښوونځي شاوخوا دوه زره زده کوونکو تر دې وړاندې تر ونو لاندې او په خېمو زده کړې کولې چې له ډېرو ستونزو سره مخ وو.
د بهسودو ولسوالۍ د سراچه علي خان د نجونو د لېسې نوې جوړه شوې ودانۍ د غويي په ۲۹مه د يونسيار ادارې او ننګرهار ولايت يو شمېر مسوولينو له لوري پرانېستل شوه.
د ننګرهار والي ضياء الحق امرخېل د دغې ودانۍ د پرانېستې په مراسمو کې وويل چې د سراچه علي خان د نجونو لېسې دوه پوړيزه ودانۍ د ۱۶ ميليونه افغانيو په لګښت جوړه شوې ده.
د هغه د معلوماتو له مخې، ياده ودانۍ ۱۲ درسي، ۴ اداري خونې، د سولر برېښنا پر مټ چمتو شوی مجهز کمپيوټر لېب او نور اړين ځايونه لري چې شته زده کوونکو ته به ډېرې اسانتياوې برابرې کړي.
د ننګرهار د پوهنې رييس حسيب الله شينواري وويل چې د سراچه علي خان د نجونو لېسه کې شاوخوا ۲۰۰۰ زده کوونکي زده کړې کوي چې تر دې وړاندې تر ونو لاندې او خېمو کې کېناستل.
هغه د يونيسيار له ادارې څخه مننه وکړه چې په مالي لګښت يې دغه ښوونځي ته ودانۍ جوړه کړه او ټينګار يې وکړ چې د دغه ښوونځي د ساينسي زده کړو لپاره به مجهز لابراتوار هم چمتو شي.
د پوهنې د رييس په وينا، ياده لېسه د ښوونکو له کمښت سره هم مخ ده چې اوسمهال ورته د سيمې د خلکو له لوري رضاکاره ښوونکي ګومارل شوي، خو نږدې راتلونکي کې به ورته ۱۷ تنه رسمي ښوونکي وټاکل شي.
د سيمې يو تن قومي مشر شفيق الله مشفق دغه ښوونځي ته د ودانۍ جوړېدو باندې خوښي وښوده او هيله يې وکړه چې ښوونځيو ته د ودانيو جوړېدو برخه کې د نجونو لېسو او ښوونځيو ته لومړيتوب ورکړل شي چې د نجونو د زده کړو پر وړاندې پلمې ختمې او ټولې نجونې زده کړې وکړي.
زرڅانګه چې په دغه ښوونځي کې زده کړې کوي وايي، له دې مخکې به په باران کې هم له زده کړو بې برخې کېدل او ډېره ګرمۍ کې به ترې هم زده کړې نيمګړې پاتې کېدلې چې د دغې ودانۍ په جوړېدو سره به اوس دا ستونزې حل شي.
