مزارشريف (پژواک،۲۲غبرګولی ۱۴۰۰):د افغانستان لپاره د ازبکستان د ولسمشر ځانګړي استازي د بلخ په حيرتان بندر کې افغانستان ته د ۱۰۰۰ بالونه مرسته شوي اکسيجن سپارلو پر مهال وويل، هېواد يې چمتو دی چې پر افغانستان لس زره بالونه اکسيجن وپلوري.
د ازبکستان له خوا افغانستان سره ۱۰۰۰ بالونه مرسته شوی اکسيجن د شنبې ورځې سهار وختي د بلخ ولايت چارواکو ته وسپارل شو.
د افغانستان لپاره د ازبکستان د ولسمشر ځانګړي استازي عصمت الله ايرګه شوف خبريالانو ته وويل چې هېواد يې د يوه ښه ګاونډي په توګه په سختو شرایطو کې له افغانستان سره مرستو ته چمتو دی.
نوموړي زياته کړه چې له افغانانو سره يې د بشرپالنې له مخې د زر بالونه اکسيجن مرسته وکړه او ډاډ ورکوي چې دغه ډول مرستې به دوام ولري.
هغه وويل: ((موږ وړاندوينه کوو چې افغان حکومت غواړي لس زره بالونه اکسيجن له موږ څخه وپېري، زه له همدې ځايه وايم چې موږ چمتو يو څو دغه اکسيجن پر افغانستان وپلورو.))
د هغه په وينا، د ازبکستان ولسمشر او ياد هېواد غواړي چي په افغانستان کې شته ستونزې حل شي.
د افغانستان لپاره د ازبکستان ځانګړی استازی وايي چې د کرونا لومړۍ څپې په سختو شرايطو کې هم ازبکستان له افغانستان سره خپله پوله پرانيستې پرېيښې وه.
نوموړي زياته کړه چې د دواړو هېوادونو د همکاريو په لړ کې په روان کال کې شاوخوا ۲۰ افغان ډاکټرانو د ازبکستان په روغتونونو کې خپل تخصص تر لاسه کړی دی.
په ورته مهال د بلخ والي محمد فرهاد عظيمي له ازبکستان څخه مننه وکړه چې په سختو شرايطو کې يې د افغانانو لاسنيوی وکړ.
د هغه په وينا، د کرونا لومړۍ څپې پر مهال هم ازبکستان لومړنی هېواد و چې له افغانستان سره يې مرستې وکړې.
د بلخ والي هيله مندي وښوده چې د ازبکستان د مرسته شوي اکسيجن په رسېدو او د دواړو هېوادونو د راتلونکو مشترکو اقداماتو په پايله کې به په افغانستان کې د اکسيجن د کمښت ستونزه تر ډېره بريده حل شي.
هغه زياته کړه چې بلخ کې د اکسيجن د وېش مديريت په وروستيو ورځو کې ښه شوی.
د بلخ د عامې روغتيا سرپرست ډاکټر ګل احمد ايوبي پژواک ته وويل چې د ازبکستان له خوا مرسته شوی اکسيجن به د بلخ په ګډون يو شمېر نورو شمالي ولايتونو کې توزیع شي.
هغه زياته کړه چې بلخ د کرونا ويروس له اړخه د زيانمنو ولايتونو په ډله کې دی چې په خبره يې دمګړۍ شاوخوا ۱۵۰ د کرونا جدي ناروغان په دولتي روغتون کې بستر دي.
نوموړي وويل چې د مرسته شوي اکسيجن له ډلې ۵۰۰ بالونه د بلخ لپاره ځانګړي شوي، چې ټول به د مزارشريف حوزوي روغتون کې ناروغانو ته ورکول کېږي.
بل لورته مزارشريف کې د ناروغانو يو شمېر پايوازان د اکسيجن وېش برخه کې له شته بې عداليتو شکايت کوي.
د مزارشريف اوسېدونکي محمد ولي پژواک ته وويل چې له تېرو څو ورځو راهيسې يې پلار د بلخ په کوويډ۱۹ روغتون کې بستر دی او دی ورته اکسيجن له بازاره په خپلو شخصي پيسو اخلي.
هغه زياته کړه چې دولتي اکسيجن هغو کسانو ته رسیږي چې پيسې او واسطه ولري.
ولي وويل: ((زه هرو ٢٤ ساعتونو کې د پنځلس تر شل زره افغانيو په لګښت خپل ناروغ لپاره اکسيجن اخلم؛ خو بل لور ته بيا خبريږم چې د دولتي اکسيجن په کود او برق فابريکه کې له ډکېدو وروسته زورواکو ته ورکول کېږي.))
نوموړی زياتوي چې يو شمېر کسان يې د سترګو پر وړاندې روغتون کې د اکسيجن نشتون له امله مړه شوي دي.
په بلخ کې چارواکي وايي چې ډېر ژر به افغان سوداګر هم له ازبکستان څخه د اکسيجن واردات پيل کړي، چې ورسره به اکسيجن ته لاسرسی اسانه شي.
