جلال اباد (پژواک، ۱ چنګاښ ۱۴۰۰): د ننګرهار ولايت چارواکي وايي چې د دغه ولايت په هسکې مېنې ولسوالۍ کې د ناچاوده مرمۍ چاودنې له امله شپږ ماشومان ټپيان شوي دي.
مسوولين وايي، د ماشومانو عمرونه له ۹ کلنۍ کم دي او په سيمه کې يې پر دغې مرمۍ لوبې کولې چې چاودنه يې پرې کړې ده.
د ننګرهار د والي وياند عطاء الله خوږياڼي د چنګاښ په لومړۍ نېټه پژواک اژانس ته وويل چې نن غرمه شاوخوا ۱۲ نيمې بجې د هسکې مېنې ولسوالۍ پاپين سيمه کې پر ماشومانو ناچاودې مرمۍ چاودنه کړې ده.
هغه زياته کړه چې د دغې چاودنې له امله د درېيو کورنیو شپږ ماشومان چې عمرونه يې له ۹ کلونو کم دي ټپيان شوي دي.
د نوموړي د معلوماتو له مخې، ټپي ماشومان د درملنې لپاره ځايي روغتيايي مرکز ته وړل شوي دي.
د هسکې مېنې ولسوالۍ د روغتيايي مرکز يو کارمند د نوم نه خپرولو په شرط پژواک اژانس ته وويل چې د پېښې له ځايه ورته شپږ ماشومان ور وړل شوي دي.
دی وايي، د ټولو ټپيانو روغتيايي وضعيت د ډاډ وړ دی.
