جلال اباد- هرات (پژواک، ۲ چنګاښ ۱۴۰۰): د ننګرهار او لغمان ولايتونو لسګونه پشه يي ځوانانو د افغان حکومت د وسله والو ځواکونو په ملاتړ او د وسله والو طالبانو پر ضد وسله پورته کړه.
دغه ځوانان چې نن د چنګاښ په ۲مه د لغمان ولايت قرغيو ولسوالي کې د ولسي جرګې د غړي حاجي حضرت علي په مشرۍ راټول شوي وو د يوې لويې غونډې پرمهال يې اعلان وکړ چې يا به وسله وال طالبان سوله کوي او يا به هم د امنيتي ځواکونو او ولس له وسله وال مقاومت سره مخ کېږي.
حاجي حضرت علي وويل چې له دغې غونډې او پاڅون څخه يې موخه د حکومت، نظام، وسله والو ځواکونو او ملت دفاع او له وسله والو ژغورل دي او تر هغه وخته چې ملت قرباني ورنه کړي سوله نه شي راتللی.
دی وايي، ملت د جګړو قرباني دی نو ځکه اوس د دې وخت راغلی چې په جګړو کې د قربانۍ پر ځای د نظام د ملاتړ او سولې لپاره قرباني هم ورکړي او اجازه ورنه کړي چې وسله وال طالبان د خپلو بهرنيو بادارانو په مشرۍ او امر دلته بيا واک تر لاسه کړي.
پاڅون کوونکو ويل، ځکه يې وسله راپورته کړې چې له خپل حکومت سره د وسله والو مخالفينو پر ضد اوږه په اوږه ودرېږي او د نظام د پایښت لپاره قرباني ورکړي.
د ننګرهار د کوز کونړ ولسوالۍ اوسېدونکی علي خان وايي چې د خپلو وسله والو ځواکونو ملاتړ کوي او د خپل وسله وال دښمن (وسله والو طالبانو) په مقابل کې جګړې ته چمتو دي.
دغه راز د لغمان د قرغيو ولسوالۍ اوسېدونکی عالم خان وايي،د خپل مشر حاجي حضرت علي امر ته چمتو دي او په هر ځای کې چې ورته هغه امر وکړي د وسله والو طالبانو او نورو دولت ضد ډلو پر ضد به جګړه وکړي.
بلخوا د هرات ولايت چارواکي هم وايي چې دغه ولايت کې هم شاوخوا ۲۰۰ ځوانانو د وسله والو طالبانو د ځپلو په موخه وسله راخيستې ده.
د هرات د والي وياند جېلاني فرهاد وايي چې دغه ولسي پاڅون کوونکي او مجاهدين په داوطلب ډول چمتو شوي چې له وسله والو طالبانو سره د ژوند تر وروستۍ سلګۍ هم جګړه وکړي.
په دې وروستيو کې د هېواد مختلف برخو کې د وسله والو طالبانو پر ضد د ولسي پاڅون لړۍ پيل شوې او ډېرو ساحو کې خلکو وسله پورته کړې ده.
