کابل (پژواک، ۱۰ زمری ۱۴۰۰): د هلمند، کندهار، اروزګان او زابل ولایتونو ګڼ شمېر اوسېدونکو په کابل کې د یوناما دفتر مخې ته د تحصن خېمې په درولو سره د اوربند او په هېواد کې بېځایه شوو ته د رسېدنې غوښتنه وکړه.
نن سهار پولیسو د یادو ولایتونو دغو لسګونو اوسېدونکو ته د ملګرو ملتونو (یوناما) دفتر مخې ته د تحصن خېمې درولو اجازه نه ورکوله، خو هغوی له پولیسو سره تر لفظي شخړې او د خپلو ګرېوانونو له شلولو وروسته خېمه ودروله.
هغوی د «موږ د تاوتریخوالي ختمېدل غواړو، لوی کندهار وژغورئ، موږ جګړه نه غواړو» شعارونه ورکول.
د راپورونو له مخې، د هلمند، کندهار، اروزګان او زابل ولایتونو ګڼ شمېر ولسوالۍ طالبانو نیولې او له څو ورځو راپه دېخوا د کندهار او هلمند په مرکزونو کې جګړه روانه ده.
په کابل کې یوه لاریون کوونکي محمد جامع چې د نورو په استازیتوب یې خبرې کولې وویل: «موږ له دواړو لورو غواړو چې جګړه ختمه کړي، د دواړو خواوو په ځمکنیو او هوایي بریدونو کې هره ورځ زموږ ماشومانو، سړي او ښځې وژل کېږي، په روغتونونو کې د ټپيانو لپاره ځای نه وي، د کندهار او هلمند خلک یوه ورځ یوې سیمې ته، بله ورځ بلې سیمې ته پناه وړي.»
هغه په کابل کې د ملګرو ملتونو دفتر ته په خطاب کې وویل: «ستاسو حضور په څه معنا دی چې خلک هره ورځ ووژل شي او بېځایه شي، موږ هره ورځ قرباني شو؟»
یو بل لاریون کوونکي قدرت الله عابد وویل: «په لوی کندهار (هلمند، کندهار، اروزګان او زابل) کې وضعیت خراب دی؛ ځوانان ورکېږي او هره ورځ وژل کېږي، هره ورځ د خلکو کورونه له دواړو خواوو په اور کې سوځي.»
د هغه په خبره، که چېرې دواړه خواوې د لوی کندهار د خلکو غوښتنو ته رسېدنه ونه کړي، دوی به خپل تحصن پراخ کړي.
ده له ملګرو ملتونو وغوښتل چې د دغه وضعیت پر وړاندې چوپتیا اختیار نه کړي او ډېر ژر دې د افغانستان د جګړې په ختمېدو او اوربند کې هڅه وکړي.
د هغه په خبره، په یادو څلورو ولایتونو کې د وروستیو جګړو له امله شاوخوا لس زره کورنۍ بېځایه شوې دي او که چېرې وضعیت مدیریت نه شي، د بېځایه شوو په شمېر کې به زیاتوالی راشي.
هغه وویل چې په یادو ولایتونو کې ځيني بازارونه تړل شوي او په روغتونونو کې د ټپيانو درملنې لپاره ځای نشته.
GET IN TOUCH
NEWSLETTER
SUGGEST A STORY
PAJHWOK MOBILE APP