کابل (پژواک، ۳۱ وږی ۱۴۰۰): د کابل ښار یو شمېر هټۍ وال وایي چې د طالبانو له راتلو وروسته په کابل کې د لونګيو او حجابونو په پلور کې زیاتوالی راغلی او نرخونه يې هم یو څه لوړ شوي دي.
له ننه پوره يوه اوونۍ مخکې طالبانو د هېواد د نورو ولايتونو ترڅنګ د پلازمېنې کابل کنټرول هم په لاس کې اخيستى دى.
که څه هم طالبانو تر اوسه د لونګۍ پر سر کولو او يا هم د حجاب په اړه روښانه دريځ نه دى څرګند کړى، خو ځيني کسان دغه کار په خپله کوي.
د همدې موضوع په اړه د کاپل ښار د لونګيو یوه پلورونکي فیض اغا پژواک خبري اژانس ته وويل چې له تېرو څو ورځو راهیسې د لونګيو په پلور کې زیاتوالی راغلی دى.
هغه وویل: ((مخکې مې د ورځې له څلورو څخه تر پنځو پورې حجابونه پلورل، خو د طالبانو په راتګ سره اوس د ورځې له ۱۵ څخه تر ۱۷ پورې حجابونه پلورم.))
دغه راز يو بل هټۍ وال نعمت الله پژواک ته وویل چې له تېرو څو ورځو راهیسې د حجابونو په بیو کې لوړوالی راغلی دی.
هغه وویل، هغه حجابونه چې مخکې په ۱۰۰۰ افغانۍ پلورل کېدل، اوس یې بيه ۱۲۰۰ افغانيو ته لوړه شوې ده.
نوموړي وویل: ((د طالبانو له راتګ څخه مې مخکې د ورځې له ۶ څخه تر ۷ پورې حجابونه پلورل، خو اوس د ورځې تر ۲۰ پورې پلورم.))
همدارنګه عبدالمالک چې په کابل ښار کې د لونګیو هټۍ لري، پژواک ته وویل چې د طالبانو له راتګ سره د لونګیو په پلور کې هم زیاتوالی راغلی دی.
هغه وویل چې د لونګیو کیفیت ته په کتو له ۳۰۰ افغانیو څخه تر ۳۰۰۰ افغانیو پورې يوه دانه لونګۍ پلورل کېږي.
نوموړي وویل: ((مخکې مې د ورځې له ۶ څخه تر ۷ پورې لونګۍ پلورلې، خو اوس د ورځې شاوخوا ۳۰ لونګۍ پلورم.))
دغه راز د کابل ښار د ١١مې ناحيې اوسېدونکي خواجه عبدالجبار پژواک ته وويل چې د طالبانو له راتګ وروسته يې يو ځل بيا لونګۍ پر سر کړې ده.
هغه وايي: ((ما تر اوسه قره قل پر سر کاوه، که څه هم چې طالبان چا ته څه نه وايي، خو اوس خوښ یم چې لونګۍ پر سر کړم.))
بل لور ته طالبانو بيا د کابل ښاروالۍ د چارو پر مخ وړولو په موخه يو کمېسيون جوړ کړى دى.
د دغه کمېسيون مشر مولوي حمدالله نعماني وايي چې دولتي ښځينه کارکوونکي بايد د اسلامي حجاب په پام کې نيولو سره دندو ته حاضرې شي.
خو نعماني د نارينه په اړه تر اوسه څه نه دي ويلي.
د يادونې ده، د حجاب او لونګۍ ترڅنګ ځيني نور مهم مسايل هم دي چې د طالبانو د نوي حکومت د مشرتابه له ټاکل کېدو وروسته به يې په اړه پرېکړې او اعلان کېږي.
Visits: 15
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن