طالبان: تر بېرته فعالېدو پورې دې خلک د کابل هوايي ډګر ته له تلو ډډه وکړي 

کابل (پژواک، ۱۰ وږی ۱۴۰۰): طالبان وایي چې د کابل په هوایي ډګر کې د تخنیکي ټیمونو له خوا د ترمیم او پاک کارۍ چارې روانې دي او له خلکو یې غوښتي چې هوایي ډګر ته له تلو ډډه وکړي.

د امریکایي ځواکونو وروستۍ ډله وړمه شپه د کابل له هوایي ډګره ووته او له دې سره یې خپله تر ټولو اوږده جګړه په افغانستان کې پای ته ورسوله.

د ځینو راپورونو له مخې، امریکايي ځواکونو په هوایي ډګر کې ځیني تاسیسات، الوتکې او وسایط هم وران کړي او له پرون شپې راهيسې په دغه هوایي ډګر کې هیڅ ناسته هم نه ده شوې.

د طالبانو له خوا په یوه خپره شوې خبرپاڼه کې راغلي: «د اسلامي امارت» ځواکونو او مجاهدینو، همدا ډول له خبریالانو او ټولو هېوادوالو غوښتنه کېږي چې فعلاً د کابل هوايي ډګر ته له تلو ډډه وکړي.

دوی لیکلي، په هوايي ډګر کې د تخنیکي ټیمونو له خوا د ترمیم او پاک کارۍ چارې روانې دي چې د خلکو د تګ راتګ په صورت کې د تخنیکي ټیمونو کارونه له خنډ او ځنډ سره مخ کېږي.

سرچینه وایي، کله چې ستونزه حل شي او هوايي ډګر فعال شي، بېرته به د کابل هوايي ډګر کارونه په عادي ډول پيل شي.