کابل (پژواک، ۸ تله ۱۴۰۰): د افغانستان د سرپرست رئیس الوزراء د حکم له مخې، هیچاته اجازه نشته چې په کابل کې د موټرو د پلټنې په پلمه کورونو او شرکتونو ته داخل شي او موټر له ځان سره بوځي.
د اطلاعاتو او فرهنګ وزارت د فرهنګي کمېسيون مرستیال احمدالله وثیق په پر خپله ټويټرپاڼه د رئیس الوزراء ملا محمدحسن اخوند د حکم متن خپور کړی.
په حکم کې راغلي: «هیچاته اجازه نشته چې د کابل ښار او مربوطاتو کې د نقلیه وسایطو او وسایلو د پلټنې په بهانه کورونو او شرکتونو ته داخل شي او له هغه ځایه وسایط او یا وسایل له ځان سره انتقال کړي.»
دا په داسې حال کې ده چې تر دې مخکې داسې شکایتونه و چې ځینې کسان د طالبانو په نوم د خلکو کورونو ته ننوتلي او موټر یې له ځان سره وړي دي.
