بامیان (پژواک، ۲۴ لړم ۱۴۰۰): د بغلان د تاله او برفک ولسوالۍ د ډبرو سکرو په یوه کان کې یو شمېر کارګرو د ناپېژاندو وسله والو له خوا د دوی د یوه ملګري د وژل کېدو په غبرګون کې خپل کارونه درولي او د امنیت د ټنګښت غوښتنه کوي.
دغه کارګر وايي چې ناپېژاندو وسله والو دوه ورځې مخکې د دوی دوه ملګري پر ډزو ووېشتل چې په پایله کې یې یو ووژل شو او بل د سر په برخه کې سخت ټپی دی.
د یادو کسانو په خبره چې ویشتل شوي کسان د بامیان او دایکنډي ولایتونو د ورس او شهرستان ولسوالیو اوسېدونکي او د هزاره قوم اړوند دي.
یو کارګر چې یې نه غواړي هویت یې څرګند شي، پژواک خبري اژانس ته وویل چې له یادې پېښې وروسته د بغلان، بامیان، دایکنډي، بلخ، پروان او کابل ولایتونو اړوند ۵۰۰ کاریګرو د ناپېژاندو وسله والو له خوا د ګواښ او وېرې له امله د ډبرو سکرو په کان کې خپلې دندې پرېيښې او کورونو ته تللي دي.
د یادونې ده، د بامیانو یو شمېر کاریګر له خپل وژل شوي همکار سره بامیان ته راغلي دي.
یاد کس چې له خپلو نورو ملګرو سره یو ځای یې د خپل وژل شوي همکار مړی د هغه کورنۍ ته لېږداوه، وویل: «بامیاني کارګر د اسلامي امارت له ځواکونو غواړي چې د دوی امنیت دې د بامیان د کهمرد ولسوالۍ تر «دواب» سیمې پورې ونیسي.»
د بغلان ولایت د تاله اوبرفک د ډبرو سکرو د کان یوه مسوول چې مستعار نوم یې محمد دی هم تایید وي چې له دوو ورځو راهیسي د هغو ناپېژاندو وسله والو له خوا د دوو کارګرو د وژل کېدو او ټبي کېدو نه وروسته شاوخوا ۳۰۰ کارګرو د وسله والو له خوا د تهدید او ډار په دلیل خپلې دندې پرېښودې او په خالي لاسونو خپلو کورونو ته ستانه شول.
محمد زیاته کړه: «له ۴۰ څخه تر ۵۰ هغه کارګر په کان کې پاتې شول چې ډېر مجبور او د موټرو کرایه یې نه لرله، نور کاریګر د وسله والو له وېرې خپلو کورونو ته لاړل، پرون یې دوه کارګر پرته له کوم دلیله وویشتل چې یو یې ووژل شو او بل سخت ټپي دی چې د درملنې لپاره مو کابل ته واستاوه، فکر نه کوم چې هغه دې هم ژوندی پاتې شي.»
د بغلان د تاله او برفک ولسوالۍ د ډبرو سکرو کان یو کارګر غلام چې خپله دنده یې پرېیښې وایي، بېکاري او فقر د دې سبب شوي چې دی او سلګونه نور کارګر د ډبرو سکرو په کان کې چې ۹۵ سلنه په کې د مرګ خطره دی، کار وکړي.
دغه کس چې د دایکنډي ولایت اوسېدونکی دی او په یاد کان کې کار کوي، په غریو نیولي غږ وایي؛ میاشتې کېږي چې په دغه معدن کې کار کوي خو په دې موده کې ډېره کمه اندازه پیسې پس انداز کولی شي خو نه شي کولی خپل کور دایکنډي ته لاړ شي؛ ځکه چې کومې پیسې ده سپما کړې، د کور لګښت یې نه پوره کوي.
ډېری دغه کارکوونکي وایي چې نه کار شته او نه امنیت، حیران دي چې خالي لاسونه څنګه خپلو کورونو ته لاړ شي، له مسوولینو غواړي چې دوی ته دې د کار زمینه برابره کړي او امنیت دې یې ټینګ کړي.
د بامیان امنیه قوماندان مولوي صدیق الله شاهین مسافر له دې پېښې بې خبري ښيي او وایي چې په دې اړه مو تر اوسه کوم خبر نه دی ترلاسه کړی.
پژواک اژانس په بامیان کې هڅه وکړه څو په دې اړه د بغلان سیمه ییزو چارواکو نظر ولري خو اړیکه ورسره ټینګه نه شوه.
