قلعه نو (پژواک، ۶ مرغومی ۱۴۰۰): د بادغیس ورزشي مسوولین وايي، په دغه ولایت کې لومړی ورزشي فعالیت د «سولې او یو بل زغملو» جام په نوم د والیبال پیل شوې سیالۍ وې چې نن پای ته ورسېدې.
د بادغیس د بدني روزنې امریت مسوول عبدالکریم وفا وايي چې یادې سیالۍ د ملګرو ملتونو د پراختیايي ادارې (UNDP) په مالي ملاتړ په دوو ډلو کې د اتو لوبډلو ترمنځ جوړې شوې وې، په یادو لوبو کې د دغه ولایت له ولسوالیو هم درېیو لوبډلو ګډون درلود.
هغه وايي: ((د والیبال یادې سیالۍ چې د روان کال د لېندۍ په ۲۷مه د سولې او یو بل زغملو جام په نوم د ملګرو ملتونو پراختیايي ادارې (UNDP) له خوا جوړې شوې وې، تېره ورځ د تابان لوبډلې په اتلولۍ پای ته ورسېدې.))
د وفا په خبره، د لومړي، دویم او درېیم مقامونو لوبډلو ته د (UNDP) دفتر له خوا جایزې هم ورکړل شوې.
بلخوا د بادغیس یو شمېر لوبغاړو په دغه ولایت کې د ورزشي سیالیو جوړولو قدردانۍ کوي او له حکومتي مسوولینو غواړي چې په یاد ولایت کې د تېر په پرتله د ورزشي فعالیتونو پرمختګ ته ډېره زمینه برابره کړي، څو دوی وکولای شي ورزش وکړي.
Visits: 7
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن