کابل (پژواک، ۲۳ مرغومی ۱۴۰۰): برېښنا شرکت وایي، ازبکستان د تخنیکي ستونزې له امله ۶۰ سلنه وارداتي برېښنا کمه کړې وه، خو نن دغه ستونزه لرې شوه او افغانستان د برېښنا رالېږد عادي حالت ته وګرځېد.
تېره ورځ د برېښنا شرکت ويلي وو چې ازبکستان له دغه شرکت سره له همغږۍ پرته افغانستان ته ٦٠ سلنه وارداتي برېښنا کمه کړې، خو تمه ده چې دغه ستونزه په څو ورځو کې حل شي.
ياد شرکت د وارداتي برېښنا د کموالي لامل د ازبکستان د تیلي مرجان په سټېشن کې تخنیکي ستونزه ښودلې وه او ويلي وو چې دغه ستونزه به د دوو یا درېیو ورځو په ترڅ کې حل شي.
د برېښنا شرکت نن خبرپاڼه خپره کړې، ويلي یې دي: «د ازبکستان د تیلي مرجان برېښنا په تولیدي دستګاه کې د تخنیکي ستونزې په لرې کېدو سره نن سهار د ازبکستان هېواد وارداتي برېښنا عادي حالت ته را وګرځېده.»
سرچينه زياتوي، له دې وروسته لنډمهاله پرچاوۍ به د برېښنا کموالي او د مزو د «اضافه بارۍ» له امله وي.
افغانستان دا مهال د ازبکستان، ترکمنستان، تاجکستان او ایران له وارداتي برېښنا ګټه پورته کوي.
GET IN TOUCH
NEWSLETTER
SUGGEST A STORY
PAJHWOK MOBILE APP