<p style="text-align: justify;">هرات ښار (پژواک، ١٨ کب ١٤٠٠): د دولتي پوهنتونونو د درسونو له پیلېدو سره هم مهاله د هرات پوهنتون ځيني محصلین د استادانو او کادرونو له کموالي شکایت لري.</p>
<p style="text-align: justify;">په افغانستان کې د نوي حکومت واک ته له رسېدو وروسته د پوهنتونونو د استادانو په ګډون زرګونه هېوادوال له هېواده ووتل او په امریکا او اروپا کې یې پناه واخیسته.</p>
<p style="text-align: justify;">دغه پروسه چې اوس هم دوام لري، د هېواد دولتي پوهنتونونه یې د کارپوهانو او علمي شخصیتونو له کموالي سره مخ کړي دي.</p>
<p style="text-align: justify;">د هرات پوهنتون د حقوقو پوهنځي د دویم سمسټر محصل احمد انوري پژواک خبري اژانس ته وویل، اوس مهال د استادانو له کموالي سره مخ دي او ډېری استادان بهرنیو هېوادونو ته تللي دي.</p>
<p style="text-align: justify;">هغه وویل، تېره ورځ مو له څلورو درسي ساعتونو څخه یوازې د یو ساعت استاد درلود، درې نور ساعتونه مو بې برخلیکه د پوهنتون په انګړ کې تېر کړل.</p>
<p style="text-align: justify;">د حمیرا انوري په نوم بله محصله، که څه هم د دولتي پوهنتونونو د درسونو پر پیلېدو خوشاله ده، خو ټینګار کوي چې اوس مهال یې په پوهنځي کې هيڅ مسلکي او باتجربه استاد نه دی پاتې.</p>
<p style="text-align: justify;">هغې زیاته کړه، اوس ښځې استادانې نجونو او نارینه استادان هلکانو ته تدریس کوي.</p>
<p style="text-align: justify;">د هغې په خبره، په ښځو کې ډېرې متخصصې استادانې نشته، له همدې امله اړتیا ده چې نجونو ته هم باتجربه استادان تدریس وکړي.</p>
<p style="text-align: justify;">د هرات پوهنتون د ادبیاتو پوهنځي محصلې عاطفې پژواک ته وویل: ((اوس یوازې څو متخصص او باتجربه نارینه استادان په پوهنتون کې پاتې دي، هغوی هم هلکانو ته تدریس کوي، خو د نجونو لپاره دغه کار د اندېښنې وړ دی.))</p>
<p style="text-align: justify;">محصلین له مسوولینو غواړي چې ځيني هغه مشران متخصص او باتجربه استادان چې د هرات په پوهنتون کې شته، باید هلکانو او نجونو دواړو ته تدریس وکړي.</p>
<p style="text-align: justify;">په ورته وخت کې د هرات پوهنتون ځیني استادان د تجربه لرونکو او مسلکي استادانو پر کموالي اندېښنه څرګندوي او وايي، هغو استادانو چې بهرنیو هېوادونو ته تللي، ښه تجربه درلوده.</p>
<p style="text-align: justify;">د هرات پوهنتون د اقتصادي پوهنځي رییس او استاد محمد ناصر معین وايي چې د پوهاند، دوکتورا، ماسټر، پوهنوال او پوهندوی په سویه استادان له هېواده وتلي دي؛ هيڅوک نه شي کولای دومره ژر د کادري استادانو ځای ونیسي.</p>
<p style="text-align: justify;">هغه وايي، دغه کار د هېواد کادرونو او انساني ځواک ته نه جبرانېدونکي ضربه رسولې ده.</p>
<p style="text-align: justify;">هغه زیاته کړه: ((د تاسف ځای دی چې د هرات پوهنتون ډېر کادري استادان بهرنیو هېوادونو ته تللي، دا کار خپله ډېره د اندېښنې وړ او نه جبرانېدونکی دی.))</p>
<p style="text-align: justify;">بلخوا د هرات پوهنتون رییس بهرنیو هېوادونو ته د استادانو تګ مني، خو له پرله پسې هڅو وروسته یې هم پژواک ته د یادو استادانو شمېر په ډاګه نه کړ.</p>
<p style="text-align: justify;">د هرات پوهنتون رییس عبدالعزیز نعماني پژواک ته وویل، ډېر استادان له هېواده وتلي، خو ډېری یې لېوال دي بېرته خپل هېواد ته راوګرځي.</p>
<p style="text-align: justify;">نوموړي د ښځو متخصصو استادانو پر نه شتون هم اندېښنه څرګنده کړه خو ټینګار یې وکړ چې د محصلینو د ستونزو د حل لپاره پر یوه طرزالعمل کار روان دی.</p>
<p style="text-align: justify;">د معلوماتو له مخې، د هرات پوهنتون د کابل له پوهنتون وروسته په هېواد کې دویم پوهنتون دی چې به تېرو شپږو میاشتو کې یې ډېر استادان بهرنیو هېوادونو ته تللي دي.</p>
<p style="text-align: justify;">د یادونې ده، هرات پوهنتون په ټوله کې ۴۳۰ استادان لرل چې شاوخوا ۱۴۰ یې د جمهوریت له سقوط وروسته د لوړو زده کړو بشپړولو په موخه بهرنیو هېوادونو ته تللي وو.</p>
<p style="text-align: justify;">د اسلامي امارت واک ته له رسېدو شپږ میاشتې وروسته دولتي پوهنتونونو درسونه پیل کړي، د لوړو زده کړو وزارت د نوي طرزالعمل پر اساس، له اصلاحاتو وروسته هلکان او نجونې په جلا ډول خپل تحصیل ته دوام ورکوي.</p>
