لاینز: ډېری هېوادونه د افغانستان له سرپرست حکومت سره همکارۍ ته لېوال دي

[restrict paid=”true”]

کابل (پژواک، ۲۵ کب ۱۴۰۰): د کورنیو چارو وزارت وایي، د ملګرو ملتونو د سرمنشي ځانګړې استازې د دغه وزارت له سرپرست وزیر سره په لینده کې ویلي چې ډېری هېوادونه د افغانستان له سرپرست حکومت سره همکارۍ ته لېوال دي.

د کورنیو چارو وزارت په خبرپاڼه کې راغلي چې د دغه وزارت سرپرست وزیر خلیفه سراج الدین حقاني تېره ورځ د افغانستان لپاره د ملګرو ملتونو د سرمنشي له ځانګړې استازې دېبورا لاینز سره وليدل.

سرچينې لیکلي چې لاینز په ملګرو ملتونو کې د افغانستان په اړه شوې غونډې خورا مثبتې وبللې او څرګنده یې کړه چې ډېری هېوادونه د افغانستان له سرپرست حکومت سره همکارۍ ته لېوال دي او افغانستان اوس د ټولو هېوادونو د پاملرنې وړ ګرځېدلی.

د خبرپاڼې له مخې، لاینز ژمنه کړې چې له افغانستان سره د بشري مرستو، بهرنیو ملاتړ کوونکو راجلبولو او همدارنګه د نشه یي توکو د کښت او قاچاق د مخنیوي په برخو کې همکارۍ ته دوام ورکوي.

د کورنیو چار وزارت سرپرست وزیر خلیفه سراج الدین حقاني هم له لاینز څخه مننه کړې چې د ملګرو ملتونو اړوند غونډو کې یې د افغانستان واقعي انځور وړاندې کړی دی.

حقاني ویلي چې د افغانستان سرپرست حکومت د بهرنیو سازمانونو د امنیت خونديتوب ته ژمن دی او له نړۍ سره سوله ییز ژوند او اړيکې غواړي.

[/restrict]