هرات ښار (پژواک، ۱۵ وری ۱۴۰۱): د هرات ولایت د سلما بند برېښنا مسوولین روان کال په یاد بند کې د برېښنا ولټاژ لوړېدو خبر ورکوي.
د سلما بند تخنیکي مسوول اینجینر احمد شریف ولي پژواک خبري اژانس ته د دغه مطلب د تایید ترڅنګ وویل، له وروستیو ورښتونو سره هم مهاله د دغه بند د اوبو ذخیره کې هم د پام وړ زیاتوالی راغلی دی.
نوموړي څرګنده کړه چې تېر کال د بارانونو نشتوالي له امله د بند د اوبو کاسه کې د پام وړ کموالی راغلی و خو له وروستیو ورښتونو سره د اوبو ظرفیت نسبتا ډېر شوی او په وروستیو څو میاشتو کې ترې شاوخوا ۱۹زره او ۵۰۰ میګاواټه برېښنا تولید شوې ده.
هغه زیاته کړه، تېر کال د سلما بند د برېښنا تولید د سږ کال په پرتله د بارانونو د کمښت له امله لږ و.
ولي له پژواک سره په خبرو کې وویل، کله چې کال اباد او بارانونه ډېر وي، د سلما بند د ۸۶،۶ میګاواټه برېښنا د تولید وړتیا لري.
په هرات کې د سلما برېښنا بند د ۶۴۰ میلیون متر مکعب اوبو ذخیره کولو او ۴۲ ميګاواټه برېښنا د تولید ظرفیت لري.
دغه بند اوس د «افغان- هند دوستۍ بند» په نوم یادېږي او په ۱۳۹۵ لمریز کال د ۳۰۰ میلیون ډالرو په لګښت د هند هېواد له خوا جوړ شوی دی.
له بلې خوا، اقتصاد پوهان وايي چې د سلما بند کولای شي د افغانستان اقتصادي پراختیا لپاره اغېزناک وي.
د هرات پوهنتون د اقتصاد پوهنځي یو استاد عطاوالله سیاوش پژواک ته وویل، که سلما بند په سم ډول مدیریت او کنټرول شي، د هرات ښار شاوخوا ولسوالیو او د ښار یوې برخې ستونزې ورسره هوارېږي.
د هرات سلما بند د ۴۲ ميګاواټه برېښنا تولیدولو ترڅنګ ۷۵زره هکتاره کرنيزې ځمکي هم خړوبوي.
د چشت شریف ولسوالۍ یوه اوسېدونکي میراحمد پژواک ته وویل چې کروندګر هر کال د اوبو له کمښت سره مخ وي او ټولې کروندې یې له منځه ځي.
په همدې حال کې، د هرات سیمه ییز چارواکي وايي، څه موده وړاندې د هغو کروندګرو چې کروندې یې له سلما بنده خړوبېږي، د ابو وېش ستونزې هوارولو پر موضوع په ولایت مقام کې خبرې وشوې.
د هرات والي مولانا نوراحمد اسلامجار په دې ناسته کې له یاد بند پورته او ښکته ولسوالیو د اوبو استفاده کوونکو ټولنې رییسانو او کلیوالو شکایتونه وارزول.
د هرات والي ټینګار وکړ چې کروندګر باید د خپل حق په اندازه اوبه مصرف کړي، څو ټولو کروندګرو ته په عادلانه ډول ورسېږي.
د هرات والي وویل: ((د ولسوالیو اوسېدونکي د سیند د اوبو وېش او استفادې برخه کې باید عادلانه او سخاوتمندانه پرېکړه وکړي.))
د سلما بند مسوولان هم ټینګار کوي چې د یاد بند ذخیره تر اوسه نه ده ډکه شوې او اوبه به یې اړتیا ته په کتو خوشې کېږي.
غړي
You need to subscribe to view the full article. Please login or register a new account.
