د ننګرهار د هسکې مېنې خلک په شخصي لګښت یو پل رغوي

<p style="text-align: justify;">جلال اباد (پژواک، ۳۱ غويی ۱۴۰۱): د ننګرهار په هسکې مېنې ولسوالۍ کې د ځايي خلکو له لوري په شخصي لګښت، د يوه مهم پل د بيارغونې کار پيل شو.</p>

<p style="text-align: justify;">د شابيو په نوم دغه پل چې د له منځه تلو خطر سره مخ دى، پرون يې د بيارغولو چارې د شينوارو اصلاحي ټولنې له‌خوا پيل شوې.</p>

<p style="text-align: justify;">د شینوارو اصلاحي ټولنې غړي عادل خان شینواري پژواک اژانس ته وويل، دغه پل چې د نړيدو له خطر سره مخ و، دوی يې د رغولو لپاره د مرستو راټولولو کمپاين ترسره کړ.</p>

<p style="text-align: justify;">نوموړي زیاته کړه چې د یاد پل د رغولو لګښت يوه ځايي با احساسه مشر حاجي همايون شينواري پر غاړه واخیست.</p>

<p style="text-align: justify;">عادل وايي، که څه هم د دغه پل د بیارغولو لګښت مشخص شوی نه دی خو ياد کس ژمنه کړې چې ټول لګښت به يې ورکوي.</p>

<p style="text-align: justify;">دغه راز، يوه بل ځايي اوسېدونکي احمد‌الله پژواک ته وويل چې د شابيو پل باندې هره ورځ سلګونه زده‌کوونکي ښوونځي ته تګ راتګ کوي؛ سربېره پر دې سیلانیان هم له همدې لارې شابيو سيمې ته ځي، نو ځکه ډېر مهم پل دی.</p>

<p style="text-align: justify;">همدارنګه د هسکې مېنې ولسوال عمر کوچي د پل د بیارغولو دا کار وستایه او په پل کې د کارکوونکو د امنيت ډاډ يې ورکړ.</p>

<p style="text-align: justify;">هغه پر ولس او مرستندويه ادارو غږ وکړ چې د دغې لرې پرتې او جګړه ځپلې ولسوالۍ په بيارغونه او ورته کارونو ترسره کولو کې همکاري وکړي.</p>