فراه (پژواک، ۸ غبرګولی ۱۴۰۱): د خوړو نړیوال سازمان له خوا په فراه ولایت کې له ۲۲زره بېوزلو کورنيو سره د مرستې لړۍ پيل شوه.
د يادې مرستې وېش نن د فراه د ټولنيزو خدماتو موسسې (فراه داتا) له خوا پيل شو.
د فراه داتا موسسې مسوول انجینر عمادالدین عماد پژواک اژانس ته وویل چې دغه مرسته د فراه په مرکز او لسو ولسوالیو کې پيل شوې او شپږ مياشتې به دوام وکړي.
نوموړي وویل چې د مستحقو کورنيو د انتخاب لپاره د دوی کار کوونکو سروې ترسره کړې ده.
هغه زياته کړه، په دغو مرستو کې هرې کورنۍ ته ۵۰ کیلوګرامه اوړه، پنځه کیلو غوړي، پنځه کیلو دالنخود، يو پاکټ مالګه او يوه اندازه د ماشومانو خواړه ورکول کېږي.
بل خوا، د فراه ولایت خلک د يادو مرستو له پيلېدو هرکلی کوي.
د فراه ښار اوسېدونکي نسيم پژواک ته وویل: «له اوږدې مودې راهيسې وزګار یم، کور کې مې اوړه نه درلودل، د خوړو نړیوال سازمان له مرستې ډېر خوښ شوم.»
د دغه ولایت د پشترود ولسوالۍ اوسېدونکي حميدالله هم وويل چې د فراه خلک ډېر بېوزله دي، حکومت او خيريه موسسې دې له دوی سره مرستې زياتې کړي.
